RAL-ip umiarsuaa nutaaq taaguuserneqarpoq
Royal Arctic Linep imarpikkoortaataa nutaaq Tukuma Arcticamik taaguuteqarpoq
Ukiumit nutaamit RAL-ip islandimiut umiarsuaatileqatigiiffiat Eimskip suleqatigalugu Kalaallit Nunaannut angallassisarnissamut pilersaarut nutaaq aallartissaavaa.
Tamatuma nunarsuup sinneranut Danmarkip avataanut Kalaallit Nunaat toqqaannarnerusumik attaveqalersissavaa.
Umiarsuaq nutaaq maanna atserneqartoq, periusissiami tassani pingaaruteqarpoq.
- Nuannaarluta tulluusimaarlutalu imarpikkut assartuisussatut umiarsuassatta nutaap aqqa maanna saqqummiussinnaanngorparput, atiata isumaa ingerlatsivittut ilisarnaatigerusutatsinnut assut tulluartoq, RAL-imi pisortaanerup tullia, Aviâja Lyberth Lennert, taama oqarpoq.
Ateq Tukuma eqiingasumut tukummaarissumullu, aalassarissumut eqaatsumullu, suliumatuumut qiimasumullu tunngatippaat.
- Ateq tapersersuerpalaartumik piumassuseqarpalaartumillu nipilik aammalu ulappaarissusermik ersersitsisoq. Kalaallit Nunatsinni siuariarnissamut tunngavissamik pilersitseqataanissaq Royal Arctic Linep anguniagarimmagu ateq taanna pitsaasumut isumassarsisitsisinnaasutut isigaarput, aammalu immakkut assartuinerup aaqqissuussaaneratigut umiarsuaatileqatigiiffiup kissaataanut tulluartillugu, tassa sukkasuumik pisariitsumillu assartuisinnaassuseqarneq.
- Aamma kalaallisut ateq taanna Kalaallit Nunaannut alapernaalernermik pilersitsisinnaavoq, taamalu Kalaallit Nunaata niueqatiginissaanut soqutiginninnermik allisitsilluni.
Royal Arctic Linep imarpikkoortaatitaassaa Nuka Arctica-mit 50 meteringajannik takineruvoq, containerillu 2.150-it usigisinnaallugit, Nuka Arcticap usigisinnaasai 782-iusut.