RAL kinguaattoorpoq: Niuertarfiit nioqqutaatiminnik nunguutsilersinnaasut

Assartuutip Tukumap kinguaattoornera pissutigalugu niuertarfinni ilisiviit ilaat imaarukkiartulersinnaapput.

Kalaallit Nunaanni Brugsenimi nioqquteqarnermi pisortaq, Jes Nyborg ilisimatitsivoq kingunissai niuertarfinni takuneqarsinnaajumaartut.

- RAL-ip assartuutaata sivikinnerpaamik sapaatip akunneranik kinguaattoormat Brugseni annertuumik eqqorneqartussaavoq. Niuertarfiit Nanortalimmiit Ilulissat tungaannut tamarmik malugissavaat, Jes Nyborg oqarpoq.

Assartukkat kinguaattoornerat Pisiffimmi eqqissisimanerusumik tiguneqarpoq. Nioqquteqarnermi pisortaq Tina Hansen naliliivoq nioqqutissat amerlanerpaat naammattumik pigineqartut:

- Pisoq soorunami ajuusaarnarpoq. Nioqqutissaatitta qanoq nungukkiartorneri maanna nakkutigaagut. Nioqqutissat ilaat sivikinnerusumik pigineqarsinnaasarput, taakkulu nungungajalluinnanngikkunik nioqqutaajunnaarallarnissaat sillimaffigaarput, Pisiffimmiit Tina Hansen oqarpoq.

Pisiffiup nunatsinni niuertarfiini tamani nioqqutit ikiliartulernissaat malugineqarsinnaassaaq.

Naatitat nillertuusivimmiittullu

Nioqqutissat sivikinnerusumik atasartut tassaapput naatitat aamma nillertuusivimmiittut. Niuertarfiit maanna amigaateqanngillat. RAL-illi assartuutaa Tukuma Nuummut ullumi tallimanngornermi pilersaarutit malillugit tikittussaagaluarpoq, nioqqutissanik nutaanik usilluni. Ilisimaneqartutulli Tukuma suli Aarhusimiippoq, atortutigut ajutooqqanini pissutigalugu kingusinaarsimalluni.

- Sapaatip akunnerata naaneraniit nioqqutissat ilaat amigaatigilersinnaavagut, soorlu naatitat. Nioqqutissallu nutaat assartuunnissaannut suli sapaatip akunnera utaqqeqqittariaqassaagut, Jes Nyborg Kalaallit Nunaanni Brugsenimiit ilisimatitsivoq.

Taassuma erseqqissarpaa Brugsenip kaaviiaartitamigut tamanna malugissagaa.

Naatitat nillataartitsivimmiitinneqartartullu ilaat timmisartukkut assartorneqartarput. Timmisartukkulli assartuinermit pisiniat pisariaqartitaat naammassineqarsinnaanavianngilaq.

Nioqquteqarneq nalinginnaasoq sapaatip akunnialuit qaangiuppata

Pisiffimmi nioqqutissat ikiliartulissanersut nakkutigineqarput. Nioqqutissallu nungutsiterluinnalissappata, assartuinermiluunniit kinguaattoortoqaqqissappat, niuertarfiup pisiniat nittartakkami tamat attaveqatigiiffiini ilisimatikkumaarpai.

- Pissutsit maanna uippallernanngitsutut isigigigut oqaatigisariaqarpoq. Quersuagut nioqqutissanik suli imaqarluarput, Pisiffimmi nioqquteqarnermi pisortaq Tina Hansen oqarpoq.

Brugsenimi nioqquteqartitsinermi immikkoortortaqarfiup naatsorsuutigaa piffissaq sivisunerulaartoq qaangiuppat nioqqutissat naammattumik pigineqaqqilissasut.

- Naatsorsuutigaara assartuut siulleq tikereersimalerpat pisiniat amerlanerujussuarnik pisiniassasut. Tamanna isumaqarpoq nioqquteqarnitsinni pigisat ataavartumik pigilernissaannut sapaatit akunneri marluk pingasulluunniit ingerlaqqaarumaartut, pingaartumik naatitat nillataartitsivimmiittullu eqqarsaatigalugit, Jes Nyborg oqarpoq.

Nioqqutissat qerisut niuertarfinni tamani naammattumik pigineqartut, niuertut ilisimatitsipput.