Royal Arctic Line
RAL-p kukkuluttornerit aaqqiissuteqarfigai
Royal Arctic Line-p upernaaq aallartittumik containerinik suliaqarnerlunnini malitsigisaanillu nunatsinni aningaasaqarnermut inuussutissarsiornermullu sunniuteqangaatsiarsimasut, kiisami iluarsiiffigigunarpai.
Upernaaq qarasaasiatigut atortorussaarutinik atuutsitsilerneqarneraniit containerilerinermi arlaleriarluni kukkusumik usiuliunneqarsimanngikkunik kukkusumik usingiaasoqartarsimavoq. Piffissammi ilaani containerit 60-it sinnerlugit kukkusumik suliarineqartarsimapput.
Nutaarsiassaq nuannersoq
Umiarsuaatileqatigiiffillu kiisami nuannersumik nutaarsiassiisinnnaalerunarpoq.
Sapaatip-akunneranut pitsaassutsimik uuttortaasarneq, umiarsuaatileqatigiiffimmit aasaaneraniillu ataasinngornerit tamaasa saqqummiunneqartartumi allassimavoq, sapaatip-akunnera 47-mi containerit tamakkerlutik suliarilluarneqarsimasut. Kingullermik taama pisoqarpoq sapaatip-akunnera 44-mi, neriuuteqarlualernerlu ima annertulersimatigaaq umiarsuaatileqatigiiffik ima oqaasertaliussamini allalluni:
- Umiarsualivinni containerinik ingerlatsineq, angalanermut pilersaarummik iluarsiisoqarnera iluaqutigilluarlugu, pitsaanerulersimasutut isikkoqarpoq, umiarsuaatileqatigiiffik nittartakkamini allappoq.
Silatusaaqqusisoq
Sulilu nuannaarutiginnillualernissamut tunngavissaqanngilaq. Umiarsuaatileqatigiiffik ima allalluni silatusaaqqusivoq:
- Containerinik ingerlatsinerup patajaallisinneqarsimaneranik oqassalluni siusippallaarpoq. Suliniutilli maanna ingerlanneqartut patajaallisaanerup paasissutissallu pitsaassusiisa pitsanngorsarnissaat, kiisalu tigusinermut tunniussinermullu piffissap pitsaanerulersinnissaa qulakkeerneqassapput, umiarsuaatileqatigiiffik sakkortuumik isornartorsiorneqartartup nalunaarutaani allassimavoq.