RG Asiamiunik amerlanerusunik sulisoqalertariaqalersoq

Royal Greenlandip, ullumikkut Kalaallit Nunaanni tunisassiorfinni qulini Asiamiunik 145-t missaanniittunik sulisullip, sulisussaaleqineq ilungersuutigilluinnarpaa. 40-t missaat Kinameersuupput sinnerilu Filippinerineersuullutik.

- Suliassani suugaluartuniluunniit tamani sulisussaaleqivugut. Filippineriniit sulisoqarnermi misilittagaqarluarpugut, amerlanerusunillu aappaagu atorfinitsitsinissarput pilersaarutigaarput. Februaarip aallaqqaataaniit nuna tamakkerlugu 180-it missaannik sulisoqassaagut, tassanngaanniillu amerlanerusunik atorfinitsitsinissaq pilersaarutaanngikkallarpoq, Royal Greenlandimi pisortaaneq Susanne Arfelt Rajamand Sermitsiaq.AG-mut oqarpoq.

Tunisassiorfiit pitsanngorsarneqassasut

Sulisussaaleqisarneq pinaveersaarniarlugu aalisakkanik tunisassiorfiit nutarterneqarnissaat pitsaanerulersinnissaallu aamma sulissutigineqartoq, taassuma oqaatigaa.

- Assersuutigalugu qerititsineq gyro-mik taaneqartartoq qerititsinermut nalinginnaasumut taartaasinnaasoq qanoq atorsinnaaneripput misissorparput. Periutsip nutaap pitsaaqutigaa tunisassiavut pitsaassuseqarnerulissammata, oqimaatsunik kivitsisarunnaassagatta tunisassiornermilu sulisussaaleqinermi sulisugut paarinerulersinnaassallugit, pisortaq oqaluttuarpoq.

Susanne Arfelt Rajamandip erseqqissarpaa nunanit allaneersut suliartornissaat eqqarsaatigineqaraangat pissutsit piviusut eqqarsaatiginissaat aamma pingaaruteqartoq.

- Qularutissaanngilaq Kalaallit Nunatsinneersunik sulisussarsiortarnerput pingaartillutigulu akisussaaffittut isigigipput. Ullumikkulli aaqqiissutissanik allanik nassaartariaqarpugut nunattalu killeqarfii qaangerlugit ujaasisariaqarluta, oqarpoq.

Nunasiartortartut amerliartornerat

Naatsorsueqqissaartarfiup aggustimi nalunaarutigaa Asiamit nunasisorpassuit amerlisimanerisigut Kalaallit Nunaanni innuttaasut amerlisimasut.

Kalaallit Nunaanni juulip aallaqqaataani innuttaasut siornamut sanilliullugit 204-nik amerlanerupput. Innuttaasut taamaasillutik katillutik 56.865-iupput.

Innuttaasut amerleriarnerannut peqqutaasut ilaat tassaavoq innuttaasut Aasiami inunngorsimasut 317-it ukiuni kingullerni nunasisarmata, tassa nunasisut 29,4 procentinik amerleriarlutik. Kalaallit Nunaanni inunngorsimasut innuttaasut naatsorsorneqarnermi 156-inik ikileriarsimapput.