RG avataaniit sulisussarsiorniarpoq
Ilulissani naammattunik sulisussaqannginnerup Royal Greenland A/S illoqarfiup nunalluunniit avataaneersunik sulisussarsiortariaqalersissinnaavaa
Ilulissani fabrikkip nioqqutissiorsinnaassusia tamakkiisoq ukiorpaalunni anguneqarsinnaasarsimanngilaq. Aamma taamaappoq aasarmanna. Tamatumunnga patsisaavoq naammattunik sulisussaqannginneq. Ukiormanna aasaanerani rejenik nioqqutissiornermi nioqqutissiorsinnaassutsip aaffaannaa atorneqarpoq qaleralilerinermilu 80 procentiata missaa atorneqarluni. Upernarneraniit aasaaq ilanngullugu inuit 50-t amigaatigineqarsimapput, kingunerivaalu nioqqutissiorsinnaassutsip tamakkiisup anguneqarsinnaasimannginnera.
Nioqqutissiorsinnaassutsimut tunioraasunillu kiffartuussinermut sulisussaaleqineq pitsaanngitsumik malitseqarpoq. Taamaattumik Ilulissat Kommuneat oqaloqatigineqarpoq, kommunemilu Suliffissaqartitsiniarnermut Inuussutissarsiornermullu Ataatsimiititaliap taperserpaa suliffeqarfissuaq avataaneersunik sulisussarsiorsinnaasoq. Sulisussat atorfissaqartinneqartut Kalaallit Nunaanniit pissarsiarineqarsinnaasut Royal Greenland A/S neriuppoq, tamannali pisinnaanngippat avataaniit tikisitsinissaq pisariaqalersinnaavoq. Sulisussaqarnermut aaqqiissutissaq 2008-p upernaavani inississimassasoq suliffeqarfissuup neriuutigaa.