RG-ip tunisassiorneq Danmarkimiit Polenimut nuunniarpaa
Royal Greenlandip saaneerajakkanik tunisassiorfini Glyngøre-fabrikimiittoq Polenimi fabrikkimut nuunniarlugu eqqarsaatigaa. Qallunaat 130-it suliffii immeraataalerput.
Europap kangiani akissarsianut appasissunut akiuunnerup aamma Royal Greenlandip Sjællandip avannaani Glyngøre-mi fabrikkimini suliassat allanngortiternissaat eqqarsaatigilersippaa. Allanngortiterinermi aalisakkanik saaneeraajariikkanik tunisassiorneq Danmarkimi akissarsianut annertuumik atuiffiusoq pineqarpoq. Polen-imi akissarsiat appasinnerupput, taamaattumik Glyngøre-mi tunisassiornermik suliaqartut 130-it ukiumit nutaamiit allamik suliffissarsisortariaqalersinnaanissartik naatsorsuutigisariaqarpaat.
Royal Greenlandip pisortaanerata Flemming Knudsenip erseqqissarpaa, tunisassiorneq Polenimut nuunneqassagaluarpat sulisut eqqorneqartussat pillugit suliffissuaqarfik pilersaaruteqartoq, nutaamik ilinniaqqinnissamut imaluunniit nutaamik suliffissarsiornerannut ikiuunniarlutik.
Pisortalli peqatigitillugu isertuutinngilaa, nammineq isiminik isigalugu allanngortiterinissat Royal Greenlandip unammillersinnaassusianut tunngatillugu pisariaqartoq.
Tamanna suliffissuaqarnermik ingerlatsisut tamarmik isumaasa paassutigaat. Unammillissagutta nunarsuarmilu niuernermut akuuginnassagutta sapinngisarput tamaat unammillersinnaasariaqarpugut, taamaaliunngikkutta suliffinnik aamma annaasaqartussaareerpugut, Flemming Knudsen Sermitsiaq.gl-imut oqarpoq.–
Pisortaanerup ilisimatitsissutigaa, aalajangerneq Royal Greenlandip Kalaallit Nunaanni tunisassiornermut eqquisussaanngitsoq.
Saaneeraajariikkanik tunisassiorneq Glyngøre-miittoq nuussagaluarpat tamanna februaarimiit arriitsumik pissaaq, nussuinerlu Polen-imi illoqarfimmi Koszalin-imi Royal Greenlandip fabrikkiutitaavanut nutaarsuarmut ingerlanneqassalluni. Fabrikki suli atoqqaartinneqanngilaq, kisianni Royal Greenlandip naatsorsuutigaa jannuaarip aallartinnerani tunisassiornerup aallartinneratigut qanittukkut atulersinnaassasoq. Royal Greenlandip maannakkorpiaq uumasut nakorsaqarfiinit oqartussat akuersissuteqarnissaat utaqqivaa, Flemming Knudsen ilisimatitsivoq.