RG-mi sulisut soraarsitat ikiorniarneqalerput
Jobcenter Skive suliassaqartitsinermut ministeriaqarfimmit aningaasanik qinnuteqarsimavoq Royal Greenlandip Glyngøremi suliffissuani soraarsitat 115-it ikiorserniarlugit, taamatut allappoq Fagbladet 3F.
Glyngøremi Royal Greenlandimi sulisut 3F-erit 115-it, suliffissuup nerpileriffiata Polenimi Koszalinimut nuunneqarnera pissutigalugu ataasinngormat soraarsinneqartut, nutaamik suliffissarsiuminaatsitsipput. Jobcenter Skive suliassaqartitsinermut ministereqarfiup soraarsitsinerujussuarni atugassarititaanik aningaasanik qinnuteqaqqammerpoq.
Naalagaaffiup suliffissaqartitsinermut centeriani pisortap Hans Henrik Pedersenip erseqqissarpaa soraarsitanut, immikkut ikiorserneqarnissaminnik pisariaqartitsisunut, aningaasat immikkut ikiorsiissutit iluaqutaasorujussuussasut.
- Sullinniarneqartut tassaapput arnat 45-t sinnerlugit ukiullit, sivisoorujussuarmik suliffissaaleqileratarsinnaasut. Aningaasat atorneqassapput qulaajaanermut, najoqqutassiinermut, piginnaasaqarnerulersitsinermut nutaamillu ilinniartitseqqinnermut. Tamanna peqatigalugu neriuppugut pissutsit nassatarisaasigut pitsaasutigut aammalu suliffissaaleqisut ikinnerisigut soraarsitat ikiorserneqarsinnaasut, Hans Henrik Pedersen oqarpoq, tassungalu aningaasat qinnutigineqartut amerlassusaat oqaatigeqqusaanngilaq, taamaallaat oqaatigisinnaallugu qinnutigineqartut amerlangaatsiartut.
Siulliit aprilip 11-ianni soraassapput, kingulliillu junip naanerani soraassallutik. Tamatuma kingorna 3F-erit 35-it Glyngøremi sinnerutissapput.