RG-p sulisut 22-t soraarsippai
Royal Greenlandip qalerallit avaleraannik suliffissuaataani sulisut suliffitik annaasussanngorpaat, tassa Greenland Springwaterip puilasup ernganik tunisassiulersussap Royal Greenlandip suliffissuaataa aasaru pisiarippagu.
Aasaru kingusinnerpaamik junip naanerani Qeqertarsuarmi Royal Greenlandip suliffissuaataani qalerallit avaleraannik tunisassiorfimmi sulisut 22-it suliunnaarsinneqassapput, KNR tusarliivoq.
Tamanna pissaaq aasap ingerlanerani Greenland Springwater AG-p, puilasup ernganik illoqarfiup ungataaniittumi tunisassiulertussap, Royal Greenlandip Qeqertarsuarmi suliffissuaataa tiguppagu.
Taama oqarpoq Royal Greenlandimi pisortaaneq, Flemming Knudsen. Taassuma oqaatigaa sulisut suliunnaarsinneqartussat Royal Greenlandip suliffissuaataani Ilulissani aamma Qasigiannguani inissisimasuni sulilersinnaanissaannik neqeroorfigineqassasut.
-Sapaatip akunnerata tulliani sulisut ataasiakkaarlugit oqaloqatigineqassapput, periarfissanik allanik aammalu ilinniaqqinnissamik neqeroorfigineqassallutik aammalu Greenland Springwater sunnerniassavarput sulisut pineqartut imermik tunisassiorfiup aallartinneqarani sulilersinniaqqullugit. Tunisassiorfitsinnik tunisinerput ajunngitsutut isigaara, tassami inuussutissarsiornerup iluani periarfissanik allanik illoqarfimmi pilersitsinermik kinguneqassammat, Flemming Knudsen oqarpoq.
Taassuma tunisassiorfimmik tunisinerminnut tunngavilersuutigaa Qeqertarsuarmi avaleqqat suliarineqartartut ullumikkut nunarsuarmi niuernermi tunisassiornermut unammillersinnaannginnerat.
Greenland Springwaterip angalatitaasa ulluni makkunani Qeqertarsuarmiittut maannakkut oqaatigisinnaanngilaat imermik tunisassiulernissaq qaqugorpiaq aallartissanersoq aammalu sulisut qassit sulisorineqassanersut.
Qeqertarsuarmi qalerallit avaleraannik tunisassiorneq 1999-imi aallartinneqarpoq tunisassiorfiullu avaleqqat ukiumut 150 tonsit 200 tonsillu akornanni suliarisarpai – taakkulu ineriiganngorlugit 75 tonsit 100 tonsillu missaanniittarput.