RG-p tunisai annikillipput

Ukiumut naatsorsuiffiusumut 2006/2007-mut naatsorsuutit decemberip ulluisa 12-anni siulersuisut ataatsimiinnerminni akueraat. Ukiumi naatsorsuiffimmi angusatigut takuneqarsinnaavoq arlalitsigut nalornisoorutaasinnaasunik pisoqarsimasoq. Raajat pillugit nalunaarummut atatillugu allannguutit, aqutsisut nikinnerat unammillernerullu sakkortusiartuinnarnera ukiumi naatsorsuiffimmi qaangiuttumi pisimapput. Ingerlatsinerulli patajaatsumik pilernissaanut tunngaviliisoqarmat aqutsisuulersut siunissamut isumalluarput.

Ukiumut naatsorsuiffimmut siulianut sanilliullugu Royal Greenlandip tunisai 205 mio. kroninik ikilillutik 5,1 mia. kroninik naleqarput. Ingerlatsinermi salliusumi angusat 98 mio. kroniupput ukiup siuliani 110 mio. kroniullutik. Akileraarutit peertinnagit ukiumi angusat 63 mio. kroniupput ukiup siuliani 65 mio. kroniullutik.

Aalisakkanik nioqqutissiorsinnaassuseq ukiup ingerlanerani naleqqussaaffigineqarsimavoq, tamannali ukiumi naatsorsuiffiusumi angusanut sunniuteqanngilaq siunissami sunniuteqarsinnaanera ilimanaateqarnerulluni. Raajanut tunngatillugu nalunaarutip allanngortinneqarnera Royal Greenlandimut 35 mio. kroninik naleqarpoq.

Angusat taama isikkoqaraluartut siunissamut isigisumik Royal Greenland arlalinnik aningaasaliivoq, aalisakkanik nioqqutissiortuni siuttunut ilaasup suliffeqarfissuup siunissaanut periarfissanik nutaanik pilersitsisunik. Aningaasaliiffigineqartut ilagaat Polenimi fabrikki 2008- p aallartinnerani ammartussaq, Arctic Green Food-iusimasup ingerlassimai arlallit, nioqqutissiorfiillu allat pitsanngorsarnerat.

Aningaasaliinerit ingerlaannaraluartut suliffeqarfissuup akiitsui 110 mio. kroninik appartinneqarput.