Ussassaarut
RG Tasiilami suliffissuassaq pillugu: 2024-mi sanaartorneq aallartinneqassaaq
Royal Greenland-ip tunisassiornermut pisortaa Lars Nielsen ilisimatitsivoq kangiani suliffissuassaq 2024-mi sanaartorlugu aallartinneqassasoq. Suliffissuup piareernissaata tungaanut utaqqiisaasumik aaqqiissutissaq pillugu suli pilersaarummik piareersitsisoqanngilaq.
Ussassaarut
Ussassaarut
Ussassaarut
Royal Greenland soqutigisaqartunit arlalinnit isornartorsiusisoqareersoq aammalu suliap ingerlanneqarnerani piumasaqaatit allanngortinneqartareersut avataasiorluni aalisarnermi saarullunnik 5.515 tonsinik aammalu suluppaakkanik 406 tonsinik juunip qiteqqunnerani pisassinneqarnikuuvoq.
Pisassiinermut atatillugu piumasaqaatit ilagaat Tasiilami aalisakkanut suliffissuarmik pilersitsisoqassasoq. Royal Greenland ilisimatitsivoq suliariumannittussarsiornissaq maanna sulissutigineqartoq, taamaammallu suliffissuup taassumalu pilersinneqarnissaanut aningaasartuutissat kiisalu atulersinneqarnissaanut ulluniinissaq suli pisinnaanngitsoq.
- Piffissalersuineq eqqarsaatigalugu ukioq manna aallartitsinissaq angumerineqarsinnaanngilaq, taamaattorli naatsorsuutigaarput aappaagu umiarsuarmut pajuttaammut siullermut sanaartornissamut atortussat tikiunneqarsinnaajumaartut, tunisassiornermut pisortaq Lars Nielsen oqarpoq.
Taamaalillunilu pilersaarutit malillugit suliffissuarmik sanaartorneq 2024-mi aallartinneqassasoq naatsorsuutigineqarsinnaavoq.
Utaqqiisaasumik tunitsiviliinissaq suli aaqqinneqanngilaq
Naalakkersuisut pisassiinermut atatillugu aamma piumasaqaateqarnikuupput, suliffissuup piareernissaata tungaanut utaqqiisaasumik tunitsiveqarnikkut aaqqiissummik pilersitsisoqassasoq. Assersuutigalugu taaneqarnikuuvoq umiarsualiisoqarnikkut tunitsiviusinnaasumik pilersitsinikkut tamanna pisinnaasoq. Piumasaqaatit taakku naammassineqanngippata ingerlatseqatigiiffiup pisassiissutit annaasinnaagai Naalakkersuisunit ilisimatitsissutigineqarpoq.
Ussassaarut
Taamaattorli Lars Nielsen-ip maannangaaq oqaatigisinnaanngilaa utaqqiisaasumik aaqqiinissaq qanorpiaq iluseqartinneqassanersoq.
- Suli aalajanginngilagut utaqqiisaasumik aaqqiissutissaq qanorpiaq iluseqartinneqassanersoq, taamaattorli oqaatigisinnaavara suliffissuup piareernissaata tungaanut utaqqiisaasumik aaqqiissuteqarnissarput sulissutigileruttoratsigu, taanna oqaluttuarpoq.
Sermitsiaq.AG-mit paasiniarparput utaqqiisaasumik aaqqiissuteqartoqarnissaanut atatillugu qaqugu kingusinnerpaamik piareertoqarnissaanik Naalakkersuisut qanoq naatsorsuutiginninnersut.
Suliffissuaq piareerpat ammarneqarpallu Royal Greenland-ip tungaanit naatsorsuutigineqarpoq qalerallit saarulliillu tunisassiassatut Tasiilami tigoqqarneqalerumaartut.
Annertussusissaa suli ilisimaneqanngilaq
Naalakkersuisut pisassiinermut atatillugu piumasaqarnikuupput inuit arfineq marluk sulisoralugit suliffissuaq ingerlanneqassasoq, maannangaarli tunisassiornermut pisortap sulisussat qanoq amerlatigiumaarnissai oqaaseqarfigisinnaanngikkallarpaa.
- Sulisut qanoq amerlatigiumaarnersut pillugu apeqqutaalluinnassaaq aalisakkat suut aammalu qanoq annertugisut suliffissuarmut tunineqartarumaarnersut. Kalaallit Nunaata Kangiani tunisassianik tigoqqaanermik misilittagaqannginnatta, siumoortumik oqaluttuarisinnaanngilarput suliffissuarmi qanoq annertutigisumik sulisoqarumaarnersoq, Lars Nielsen nassuiaavoq.
Sunaluunniillu aalisagaq suliffissuarmut tulaassorneqaraluarpat aallaqqaammut sinneqartoorsinnaanissaq Lars Nielsen-ip takorloorsinnaannginnerarpaa.
- Naatsorsuutiginngilarput suliffissuaq sinneqartoorsinnaassasoq, taamaattorli oqaqqiinnassaanga maanna suli naluarput aalisakkat suut aammalu qanoq annertutigisut tulaanneqartarumaarnersut suli naluarput, taamaammat piffissap kisimi takutikkumaarpaa suliniutip taassuma aningaasatigut qanoq inissisimalerumaarnissaanut.
Taamaattorli naatsorsuutigineqartut ataatsimut isigalugit suliffissuarmut aningaasaliinissaq ilanngunnagu 200 millioner koruunit sinnerlugit sinneqartoortoqarsinnaanera tagginneqarnikuuvoq saarulliit pisassiissutigineqartut 5.500 tonsit sinnerlugit annertussusillit nalingi tunngavigalugit.