RG unammilleqatigiinnermik killileeqataavoq
Royal Greenlandi Qeqertarsuup Tunuani Upernaviullu eqqaani aalisartut unammilleqatigiinnissaannut akornutaammat, piginnittuminit aningaasaleeqataalluni aalisariutitaartitsisarunnaaqquneqarpoq.
Royal Greenlandip sisamanngormat ataatsimeersuarnerani naalakkersuisut piumasaraat ingerlatseqatigiiffiup aalisartut aalisariutisisarnerannut tapiisarnini unitsissagaa, Qanoruumi tusarliunneqarpoq.
Aalisariutilli qassit tapersimanerlugit RG-p isertuuppaa.
KNR-ip paasisai naapertorlugit aalisariutit arfineq-pinasgut pineqarput, Uummannami, Ilulissani Qasigiannguanilu. Aammali Upernavik Seafoodimi piginneqataanermigut RG Upernaviup eqqaani aalisariutinik aningaasaleeqataavoq.
Tassani pisortaq Flemming Andersen Qanoruumut oqarpoq piginnittuunngikkaluarlutik aalisariutit 11-12 aningaasaleeqataaffigisimallugit.
Taamali aningaasalersuineq unammilleqatigiinnermut ajoqutaasoq aningaasarliornerullu nalaani aalisartut isertitaqarniarnerannik eqquinerlussinnaasoq naalakkersuisut isumaqarput.
Naalakkersuisut isumaqarput Royal Greenlandip periuseq ukiuni kingullerni 15-ini ingerlassimasani unitsissagaa.