Royal Arctic Line Aalborgimi nutaaliorpoq
Tunngaviusumik umiarsualiunissamik isumaqatigiissut aallaavigalugu Royal Arctic Line A/S Aalborgimi Grønlandshavnimi nutaaliorniarpoq.
Royal Arctic Linep tunngavisumik umiarsualivissatut Aalborg Havn A/S-imik isumaqatigiissut 2022-mut sivitsorpaa. Taamalilluni Aalborg Havn annertuumik aningaasaliinissamik pilersaaruteqalerpoq, Royal Arctic Linellu suliffeqarfiutini kattuttippai.
- Nutaanik periarfissaqarnissarput ukiuni kingullerni anersaaruluutigiuarsimavarput. Ineriartornermi tamanna pisariaqalersimavoq. Tunngaviusumillu umiarsualiveqarnissamik isumaqatigiissuteqarnerup sivitsorneratigut tamanna pisinnaalerpoq, Jesper Balthazar-Christensen, Arctic Container Operationimi – Royal Arctic Linep pigisaani - pisortaaneq oqarpoq .
Sivitsuineq Royal Arctic Linep 2011-mi nutaaliamik quersuartaarnissaanik toqqorsiveqalernissaanillu kinguneqassaaq, Grønladshavnimilu allaffinnut nutaanut nuuttoqarluni. Aamma qerititsisinnaaneq nillataartitsisinnaanerlu annertusineqassapput.
Aalborg Havn tassaassaaq nutaanik sanaartortussaq. Nutaamimmi isumaqatigiissusiornikkut qulakkeerneqarpoq ukiuni 11-i tulliuttuni attartorteqarnissaq.
Isumaqatigiissut nutaaq iluaqutaaneruniassammat Aalborgimi suliffeqarfiutivut Arctic Container Operation aamma Royal Arctic Linieagentur kattupput. Jesper Balthazar- Christensen kattunnerisigut pisortaaninngussaaq. Maannakkut Royal Arctic Linieagenturimi pisortaaq, Erik Th. Møller kattunnermut atatillugu suliffeqarfimmiiginnassaaq suliffeqarfiit kattunnerannik periarfissanillu nutaanik suliaqarluni.
- Suliffeqarfiit kattunnerisigut siunertaavoq umiarsualivimmi pisut ineriartortinnissaat, aammalu pisariillisaanermut iluaqutaassaaq, Jesper Balthazar-Christensen oqarpoq.
Kattunneq inissallu nutaat siunissami Royal Arctic Linep Kalaallit Nunaannut assartuinerata pisariillisarneranik pikkorinnerulerneranillu kinguneqassasut ilimagineqarpoq, Royal Arctic Linemi pisortaaneq Jens Andersen oqarpoq.
- Kattunnikkut nutaamillu isumaqatigiissusornikkut nutaanik periarfissaqalerpugut, nunatsinnut tamarmut iluaqutaasussanik. Taamaattumik Royal Arctic Line taamaaliorpoq. Aalborgimi periarfissat susassaqarfitta avataanniittut atorluarnerisigut isertitaqarnitsinni nunatsinni kiffartuussinermik pitsaasumik pilersitsisinnaavugut piginnittutsinnullu Namminersorlutik Oqartussanut, aningaasatigut naammaginartumik inerititaqartitsilluta. Taamaaliorsinnaavugut saniatigut Kalaallit Nunaannut Kalaallillu Nunaanniit assartuinermut akit naammaginartuutillugit, aamma naak aningasartuutit qaffariartoraluartut, Jens Andersen oqarpoq.