Royal Arctic Line-mi marluk pisortatut atorfinitsinneqarput
Royal Arctic Line marlunnik pisortanngortitsivoq, taamaalilluni Ivalu Kleistip soraarnerani Niels Clemensenillu pisortaanertut atorfininnerani, umiarsuaatileqatigiiffimmi aqutsisoqatigiit inissipput.
Jesper Hansen
- Royal Arctic Linemi aqutsisoqatigiit ataatsimoortut saqqummiussinnaagakkit nuannaarutigaara, suleqatissavummi pikkorissut marluk atorfinni pingaarutilinni marlunni atorfinitsippavut, atorfinitsinneqartullu aappaa piginnaanilinnik ineriartortitsinissamut ingerlatseqatigiiffiup aaqqissuussaanit toqqaannartumik pilersitaavoq, Royal Arctic Linemi pisortaaneq Niels Clemensen, umiarsuaatileqatigiiffiup nittartagaani oqarpoq.
Chief Operations Officeritut aamma Chief Commercial Officeritut atorfiit inuttaqalerput.
Chief Operations Officer Aputsiaq Lynge, Royal Arctic Line
Assiliisoq: Royal Arctic Line
Air Greenlandimi atorfimmeersoq
Aputsiaq Lynge juunip aallaqqaataani 2024-mi Chief Operations Officeritut atorfinissaaq. Pilersuinerup tamarmiusup aqunneqarnera, ingerlatseqatigiiffimmilu kisermaassiviusumi niuernikkut ingerlatsinermi sullissinissamut piumasaqaataasut naammassissallugit taassuma akisussaaffigissavaa.
- Sulisut 300-t missaanniittut aqutsisuuffigissavai, aamma qullersaqarfimmi umiarsualivinnilu ingerlatsinermut tunngasunik suliassanut aaqqissuussaanikkut akisussaasuussaaq. Pitsaassuseq isumannaallisaanerlu, sulisunik ilinniartitsinerup ineriartortitsinerullu qulakkeernissaa kiisalu sulinermi avatangiisinik pitsaasunik sulisullu naammagisimaarinnilluarnissaannik siuarsaanissaq Aputsiap ukkartariniarpai.
Aputsiaq Lynge Air Greenlandimi Ground Operations Manageritut atorfimmeerpoq Cand. merc.HRM-itullu ilinniagaqarluni, Ivalu Kleistilu, ukiuni 25-ni Royal Arctic Linemi sulereerluni nutaanik unammilligassaqarniarluni aalajangersimasoq, taarserpaa.
Chief Commercial Officer John Aage Nielsen, Royal Arctic Line
Assiliisoq: Royal Arctic Line
Suliffeqarfiup iluani atorfinitsitsineq
John Aage Nielsen apriilip aallaqqaataani 2024-mit Chief Commercial Officeritut atorfinippoq. Royal Arctic Linemi 2020-mi Key Account Manageritut John Aage Nielsen atorfinippoq, kingornalu 2021-mi Sullissinermut pisortatut atorfinitsinneqarluni.
- Taamaattumik suliffeqarfiup iluani piginnaasalinnik ineriartortitsinissamut aaqqissuussineq tunngavigalugu atorfinitsitsisoqarpoq, ilisimatitsissutaavoq.
Niuernikkut sullitanullu tunngasutigut ingerlatseqatigiiffiup suliai, ilaatigullu ingerlatseqatigiiffiup sullitaanik oqaloqateqarnerup nukittorsarneqarnissaa John Aage Nielsenip akisussaaffigissavai. Niuernermut tunngatillugu kisermaassiviup avataani aningaasarsiornissamut periarfissat ukkatarineqassapput, ingerlatseqatigiiffiup naammassisaqarsinnaassusianik pitsaanerpaamik atuinissaq siunertaralugu, ilisimatitsissutaavoq.
John Aage Nielsen politiitut ilinniarsimavoq, maannalu tuniniaaneq pilersaarusiornikkullu aqutsineq ukkataralugit aqutsisutut ilinniakkamik ingerlataqarpoq.
Pisortaaneq Niels Clemensen, pisortaanerugallartutut atorfinitsinneqarnissami tungaanut 2021-mit 2023-mut CCO-usoq, John Aage Nielsenip taarserpaa.
