Royal Greenland nipisat pillugit: Akinut isumaqatigiissut tamanut atuutissaaq

Royal Greenland nipisanniarneq kingusinaartoq pillugu oqallinnermut maanna ilannguppoq.

Ingerlatseqatigiiffik tusagassiuutitigut nalunaarummi allappoq, suliaqarfimmi ingerlatseqatigiiffiit allat peqataajumappata nipisat suaannut akinut isumaqatigiissusiornissaq piareersimaffigineqartoq.

KNAPK tunisinermi akit pillugit isumaqatigiissummik ujartuisimavoq piumasaqarlunilu, Royal Greenland siornamut sanilliullugu kiilumut qaffasinnerusunik akeqartitsissasoq.

Royal Greenland pingasunngornermi allappoq, ingerlatseqatigiiffik akit pillugit isumaqatigiissummut ilanngunnissamut piareersimasoq:

- (..) isumaqatigiissut Royal Greenlandimut piumasaqaatit atuuttut assigalugit nipisat suaannik tigooraasunut tuniniaasunullu allanut aamma atuutissappat.

Unammillertinit ajornerusumik inissisimassanngilagut

Namminersorlutik Oqartussat ingerlatseqatigiiffiutaat innersuussivoq, Royal Greenland kisimiilluni akit pillugit isumaqatigiissusiorfigineqarpat ingerlatseqatigiiffik unammillertinut sanilliullugu ajornerusumik inissisimalissasoq, unammillertimmi niuerfinni pissutsit naapertorlugit akit qaffallugillu apparsinnaavaat.

- Royal Greenland taamaaliorsinnaanavianngilaq. Taamatut inissisimanissarput kissaatiginngilarput.

Royal Greenland piareersimavoq kiilumut aki 22 kr. +1 kr. aggornersiatut ukioq manna niuerfinnilu maanna atugassarititaasut naapertorlugit naatsorsugaasup akigitinneqarnissaanut, tamatumunngalu ilanngullugu tigoorarsinnaasat annertussusaat ukiup siulianut sanilliullugit 100 tonsinik annertunerulersillugit qaffallugit. Tassa imaappoq ukioq manna katillugit 900 tons tigooqqassallugit naatsorsuutigalugu.

Sermitsiaq.AG-p Polar Seafood oqaaseqartinniarsimagaluarpaa, taannalu maannamuugallartoq oqaaseqarusunngilaq.

Danmarkimi akit qaffasissut?

KNAPK tallimanngormat paasissutissiivoq, kattuffiup piumasaqaataa tassaasoq tunisinermi akinik isumaqatigiissuteqartoqassasoq taakkualu siornamut sanilliullugit qaffasinnerussasut. Siorna kiilumut 22 koruuninik akeqartitsilluni aalisarnerup ammarneqarnissaa isumaqatigiissutigineqarpoq.

KNAPK Danmarkimi nipisat suaat kiilumut 3.000 kr. angullugit tunineqartarsimanerannik innersuussivoq. Royal Greenlandimit tamatumunnga atatillugu oqaatigineqarpoq, nipisiat suaat nutaat killilerujussuarmik annertussusillit pineqartut.

TV2.dk naapertorlugu ukioq manna qaammatit siulliit marluk ingerlaneranni Danmarkimi Danmarkip imartaanit tamanit arnarluit 4.200 kiilut tunineqarsimapput:

- Kalaallit Nunaanni pisarineqarsinnaasut 2023-mi annertunerpaaffissaat tassaavoq suaat 1475 tonsit. Tamatumani nipisamit ilivitsumiit suaannarnut naatsorsueqqeriaaseq 4,0-iummat januaarimi februaarimilu annertussutsit Danmarkimi aalisarneqartuniit 1.400-riaammik qaffasinnerupput.

- Aammattaaq nipisat suaannik nunatsinneersunik nioqqutit Danmarkimi tuniniarneqartuniit allaanerupput. Suaat Royal Greenlandip tigooqqartagai tunisassiorfissuarmi suliarineqarlutillu igalaaminernut poortorneqartarput. Tunisassiaq qaqerlaatut ukiup ilaani pineqarsinnaasutut inngilaq, taamaammallu qaqerlaatulli tunineqarsinnaanngilaq, Royal Greenland allappoq.