Royal Greenland nutaamik raajarniutitaaqqilersoq
Royal Greenlandimi kilisaatinik nutarsaanermut atatillugu kilisaat Akamalik kilisaammik nutaamik nutaaliaasumillu taarserneqassaaq.
Royal Greenlandi kilisaataatiminik nutarterinini ingerlateqqillugu kilisaammik nutaamik tallimassaat pisiaqarsimavoq. Kilisaatip nutaap Akamalik taarsissavaat, taamatullu taaguuteqaannartinneqassalluni. Kilisaatitoqaq assingalugu raajarniartussaavoq.
Akamalik 82,3 meterinik takissuseqassaaq 2950 m3-inik useqarsinnaalluni, 15 knobimik sukkassuseqarlunilu inuttanut 30-nut inissaqassatussavoq. 2025-mi suliaralugu naammassineqarlunilu atorneqalissasoq naatsorsuutigineqarpoq.
Kilisaatinik nutaanngitsunik taarsersuinermi siunertarineqarpoq, pitsaanerusumik tunisassiorsinnaassuseqarnissaq, aalisarsinnaassuseqarnissaq, nalimmassarsinnaassuseqarnissaq kiisalu silaannarmut sunniuteqarnerup annikinnerulersinneqarnissaa. Royal Greenlandimi tunisassiornermi pisortaq Lars Nielsen taamatut oqaluttuarpoq.
- Kilisaatissamik inniminneeqqinnerput nuannaarutigalugu oqaatigisinnaavarput. Kilisaatit nutaat ilaqqinnerisigut aalisarnerput pitsanngornerussaaq, soorlu aamma orsussamik atorluaanerullunilu inuttatsinnut pitsaanerusumik atugassaqarfiujumaartoq, taanna oqarpoq.
Spaniami umiarsualiviliorfimmut inniminneeqqittoqartoq
Umiarsualiorfik Spaniap avannaaniittoq Astilleos De Murueta kilisaatiliussaaq. Umiarsualiorfiup taassuma kilisaatit nutaat siulliit sisamat aamma sananikuuai. Tamanna arlalinnik peqquteqartoq, Lars Nielsen nassuiaavoq.
- Kilisaataatigut sisamat, Sisimiut, Avataq, Nataarnaq aamma Tuugaalik iluarisimaaqaagut, taamaammallu Astilleros De Murueta suleqatigeqqinniarparput. Tamatumunnga atatillugu ilusilersuinerit kilisaatilioriaatsillu siornatigut atorneqareersut atoqqissinnaagatsigit taamaalilluta akia appasinnerutissinnaavarput, taanna oqarpoq.
Kilisaat nutaaq Akamalimmik ateqartussaq 2025-mi atulerneqassalluni naammassisussatut naatsorsuutigineqarpoq. Taassuma Akamalik maanna kilisaataatigineqartoq 2001-imililu atulersoq taarsissavaa, Royal Greenlandimillu naatsorsuutigineqarpoq, Akamalik suli atorluarsinnaasoq taarserneqarpat akimik pitsaasumik akilerlugu tuniniarneqarsinnaasoq.
Royal Greenland 2019-imili kilisaataatinik nutaanik nutaaliaanerusunillu taarsersuilerpoq.