Royal Greenland siulersuisuni taarsiisoqarpoq
Royal Greenlandimi siulersuisut affaat ippassaq ataatsimeersuarnermi taarserneqarput, kalaallit arnat marluk aamma DFDS-imi pisortaasimasoq ilaasortanngorput.
Piginnittoq – tassa Namminersorlutik Oqartussat – aamma siulersuisunut siulittaasoq Niels de Coninck-Smith isumaqarput, aalisarnermik suliffeqarfissuup siulersuisoqarfiani inini inuit nutaat pisariaqartinneqartut.
Arnat marluk angut ataaseq
Arnat marluk inuussutissarsiornermik ingerlataqartut toqqarneqarput, taakkulu qallunaamik inuussutissarsiornermi misilittagartuumit ilaqarput.
TLS Ressourcerimit pilersitsisoq, Tina Lynge Schmidt, ilaatigut Ilisimatusarfimmi administrationimi bacheloritut, aaqqissuussaanermi aamma aqutsinermi HD kiisalu coachitut ilinniarsimasoq ilaasortanngortut ilagaat.
Maniguuttoq
- Suliassaq maniguullunga iserfigaara, Tina Lynge Schmidt, Sermitsiaq.AG-mut taama oqarpoq, taanna ataatsimeersuarnermi Naalakkersuisut Siulittaasuannit Kim Kielsenimit oqaluttarfimmit immikkut inuiiani pilluaqquneqarpoq.
Tina Lynge Schmidtip nammineq suliffeqarfiutiminik sulisussarsiornermik aamma aqutsinermik ukkataqarluni pilersitsinnginnermini siornatigut suliffeqarfimmi anginerusumi sulisoqarnermut pisortatut atorfeqarnikuuvoq. Taanna Nuup Bussii A/S-ip siulersuini maanna ilaasortaavoq.
Arnap aappaa siulersuisuni nutaamik immersuisussaq tassaavoq, cafemik piginnittoq Krissie Berthelsen Winberg, Nuup qeqqani cafenik nuannarineqarluartunik Esmeraldamik aamma Pascuccimik piginnittoq.
Uummateqarfigisaa
Krissie Berthelsen Winbergip kajumissutsimik suliniaqatigiiffimmut Nanubørnimut, meeqqanut sumiginnakkanut ukkatarinnilersitsisumut uummateqarfiginnilluni suliaqarnikuuvoq.
Købemhavns Universitetimi sociologi ilinniarsimavaa, San Diegomilu ilinniarfiit arlallit ilinniarfiginikuullugit.
Angusat kusanartut
Niels Smedegaard ilaasortanngortut pingajoraat, taanna ukiorpassuarni umiarsuaatileqatigiiffimmi misilittagaqarpoq. Taanna 2007-mit DFDS-imi pisortaaneruvoq, kisianni sapaatip-akunneri arlaqanngitsut matuma siorna siulersuisuni sulinermik aallussiniarluni taamaatippoq.
Timmisartortitseqatigiiffimmi Norwegian Air Shuttlemi, annertuumik akiitsoqartumi aamma amigartooruteqarfiusumi, siulersuisunut siulittaasutut innersuunneqarsimasoq qanittukkut saqqummiunneqaqqammerpoq.
Niels Smedegaard CBS-imi cand. merc.-imik ilinniarsimasuuvoq, DFDS-imilu sulinermini umiarsuaatileqatigiiffiup kaaviiaartitai 8,3 milliardit koruuninit 15,7 milliardit koruuninut qaffatsissimavai. Angusat 400 millionit koruuninit 1,6 milliardit koruuninut qaffanneqarput.
Ilaasortat pingasut nutaat Sara Heilmann, Tim Ørting Jørgensen aamma Åse Aulie Michelet taarserpaat.