Royal Greenlandimi ajunngitsorsiassarsinersuaq

Royal Greenland 2023-mi suli akileraartinnani 255 millionit koruuninik amigartooruteqartoq, suliffeqarfiup pisortaanertaava Susanne Arfelt Rajamand 3,0 millionit koruuninik ajunngitsorsivoq. 

Taassuma akissarsiami aalajangersimasut 5,131 millionit koruunit saniatigut ajunngitsorsiai ilanngukkaanni katillugit 8,1 millionit koruunit sinnilaarlugit siorna akissarsivoq. 

Tuniniaanermut pisortaasimasoq, Bruno Olesen, 3,380 millionit koruuninik ajunngitsorsivoq. Taassuma aalajangersimasumik aningaasarsiai ilanngukkaanni ukioq 2023-mi katillugit 6,4 millionit koruninik akissarsiaqarpoq.

Namminersorlutik oqartussat suliffeqarfiutaanni pisortat allat marluk ajunngitsorsiakinnerungaatsiarput. Aningaasaqarnermut pisortaq, Nils Duus Kinnerup, 242.000 koruuninik nioqqutissiornermullu pisortaq, Lars Nielsen, 245.000 koruuninik ajunngitsorsipput. 

Taamaalilluni aningaasarsiaat katillugit 3.467.000 koruuniupput, aappaatalu 3.336.000 koruuniullutik. 

'Paasissutissat Royal Greenlandip 2023- mut natsorsuutaani »Pisortaqatigiit aningaasarsiaat«-ni allaqqapput.

Qullersaqarfimmi pisortat aalajangersimasumik akissarsiami saniatigut angusat aallaavigalugit ajunngitsorsisimapput. 

Aammattaaq pisortat namminneq akiligarinngisaminnik biileqartinneqarput, oqarasuaateqarlutik, internetteqarlutik aviisinillu pisarlutik. 

Susanne Arfelt Rajamandip atorfininnerminut atatillugu aningaasarsinera, Bruno Olesenillu soraarnermini immikkut pissarsiai siorna ajunngitsorsisitsinermi nalunaarsukkat katinnerannut ilaapput. 

Susanne Arfelt Rajamand pisortaanertut februaarip aallaqqaataani 2023-ni atorfinippoq, Bruno Olesenilu tuniniaanermut pisortatut ukiup taassuma naanerani suliunnaarluni. 

Mikael Thinghuus atorfeqarallaannarnerminut 2022-mi ajunngitsorsivoq, taanna pisortaanertut septembarip 30-ni 2022- mi atorfimminit tunuarpoq. Taassuma 4.557.000 koruunit ajunngitsorsiarai, Thinghuusillu 2022-mi akissarsiai katillugit 7.929.000 koruuniupput. 

255 millionit koruuninik amigartoorneq 

Royal Greenland oqaatigineqareersutut akileraarutit peerneqartinnagit 255 millionit koruuninik siorna amigartooruteqarpoq. Naatsorsuutillu ataatsimut kisikkaanni amigartoorutit 211 millionit koruuniupput. Kaaviaartitat ataatsimut 5,8 milliardit koruuniupput. 

Chilemi aallussat aningaasatigut annaasaqaataaffiungaatsiarlutik 2023-mi 85 millionit koruuninik amigartooruteqarfiupput. Royal Greenland nassuiaavoq tamanna 2022-p naanerani Kinami akuersissutinik annaasaqarnerup ilaatigut kingunerigaa. Taamaalilluni 2022-mi tunisassiat »tunisassianut nalinginnaasunut niuerfinni tunineqarnatik saattuat nerpiinut niuerfinni allani tunineqartariaqalersimallutik«. 

2023-mi amigartooruteqarujussuarneq allanik aamma peqquteqarpoq. Raajat uusut qalipaajakkallu tunisassiatut immikkoortukkaatut isertitaqarfiunerat 2023-mi appariarnerpaavoq. Royal Greenland aamma akiitsoqangaatsiarpoq. Akiitsut 2022-mi katillugit 4,5 milliardit koruuniusut 2023-mi 4,6 milliardit koruuninut qaffariarput. 

Royal Greenlandip aningaasaqarnera aaqqinniarlugu arlalinnik iliuuseqartoqassaaq. Ilaatigut atorfiit 100-t atorunnaarsinneqassapput. 

Taakku atorfiit pingajorarterutaat inuttaqanngillat, taamaattumik sulisut 65-t suliunnaarsinneqassapput. Nunatsinni Royal Greenlandeqarfinni sulisut qulinit ikinnerusut soraarsinneqassapput, sinnerilu Royal Greenlandip Europami tuniniaanermut nittarsaassinermullu allaffeqarfiini sulisut soraarsinneqassallutik. 

– Aalajangerneq soorunami oqitsuinnaanngilaq, sorpassuilli sukumiisumik nalilersoreerlugit taamaaliortariaqarpugut. 

– Aningaasaqarnerput aaqqinniarlugu, niuerneq aalaakkaasoq pisisartuttalu pisariaqartitaat piviusunngortikkusullugit taama aalajangernerput pisariaqarluinnarpoq, Susanne Arfelt Rajamand Sermitsiaq.gl-mut sapaatip-akunnerata siuliani oqarpoq.