suliffissat
Royal Greenlandimi sulisut ukiumi ataatsimi 223-nik ilapput
Nunatta suliffeqarfiutaa angisooq Royal Greenland, 2014-imi aamma 2015-imi nunatsinni tunisassiornermut atatillugu amerlanerujussuarnik sulilersitsivoq
Ukiumi naatsorsuiffiusumi 2014-15-imi Royal Greenlandimi sulisut ukiup siulianut naleqqiullugu 223-nik amerlanerulerput, tassani sulisut 978-iummata.
Royal Greenland tusagassiuutinut nalunaarummi taama allappoq.
Sulisut 1202-nut amerlinerat Upernavimmi eqqaanilu tunisassiorfinnik tigusineq aamma tunisassiorfinni sisamani saarulliit nerpiinik tunisassiulerneq ilaatigut peqqutaaqataavoq.
Atuaruk: Saarullinniarnerup ajalusoorneranut pissutaasoq ilisimatuut paasivaat
Sineriak tamakkerlugu suliffiit nutaat
2014-imi oktoberip aallaqqaataani Royal Greenlandip Upernavimmi eqqaanilu tunisassiorfiit tigummagit sulisut 120-nik ilapput. Paamiuni, Maniitsumi, Sisimiuni aamma Kangaatsiami tunisassiorfiit saarulliit nerpiinik tunisassiulermata saarulleqarlualeruttorfiani sulisut 150-inik amerlipput. Taamatuttaaq sulisut qaammammusiallit Nuummi qullersaqarfimmi aamma sineriammi atorfinitsinneqarput.
Saarulliit nerpiinik tunisassiorneq suliassaqartitsivoq
2015-imi upernaakkut Royal Greenlandi saarulliit nerpiinik tunisassiorfinni Paamiuni, Maniitsumi, Sisimiuni Kangaatsiamilu tunisassiulerpoq.
Paamiuni Royal Greenlandip tunisassiorfiani saarulliit nerpiinik tunisassiorneq aallartimmat sulisut 60-inik ilaneqarput. Kingorna tunisassiorfiup saarullinnik tunisassiorneq ingerlatiinnarpaa sulisullu nutaat 60-it suliinnarmata ullumikkut Paamiuni tunisassiorfimmi sulisut 130-iupput.
Maniitsumi suliniut suliffissaqartitsisoq
2015-imi upernaakkut Maniitsumi saarulliit nerpiinik tunisassiaq Nutaaq Cod tunisassiaralugu aallartimmagu sulisut nutaat 30-t 40-llu akornanni sulisorineqalerput. 2015-imi ukiaanerani saarulliit nerpiinik Nutaaq Cod-inik tunisassiorneq unimmat qaleralinnik tunisassiorneq aallartimmat tunisassiorfimmi sulisut taakku sulisoriinnarneqarput.
Sisimiuni saarulliit nerpiinik tunisassiorneq juulimi aallartimmat raajanik tunisassiorneq unitsinneqarallarpoq. Oktoberimi raajanik tunisassiorneq aallarteqqimmat sulisut nutaat 35-t sulilersinneqarput.
Atuaruk: Nunarput Barentshavimi 3.500 tonsinik saarullittassaqarpoq
Kangaatsiami ajornartorsiorneq
Kangaatsiami saarulliit nerpiinik tunisassiorneq aallartinneqarmat sulisut 20-t sulisorineqalerput. Kingorna saarulliit nerpiinik tunisassiorneq illoqarfimmi imissaaleqineq pissutigalugu unitsinneqarmat sulisut 20-t suliunnarsinneqarallarput. Kangaatsiami imeqarniarnikkut ajornartorsiut aaqqinneqareerpat Kangaatsiami saarulliit nerpiinik tunisassiorneq aallarteqqinneqassaaq.
Ukiumi naatsorsuiffiusumi 2014-15-imi Royal Greenlandip Nunatsinni, Danmarkimi nunanilu allani sulisui katillutik 2.156-iupput ukiumi naatsorsuiffiusumi 2013-14-inimi Royal Greenlandimi sulisut katillutik 1.906-iusimasut.
Atuaruk: Royal Greenlandip siuariartornini ingerlatiinnarpaa