Royal Greenlandimit aarlerisaarut: Kilisaatitsinni inuttat amigalingajalerput
Royal Greenlandip kilisaataanni angisuuni tallimaasuni, ukioq naallugu suliaqartartuni, inuttat sisamararterutaat ukiut qulit iluanni soraarninngoriissapput. Ilinniarsimasullu taarsiisinnaasut amigaataapput.
Royal Greenland nalunaarusiaa naapertorlugu, umiarsuit avataasiortut kilisaatit Akamalik, Qaqqatsiaq, Sisimiut, Nataarnaq aamma Tuugaalik, ukiuni tallimani 15-ini tulliuttuni inuttat annerusumik taarsersorneqassapput, inuttat amerlanersaat angallatit naalagaat, aquttut, igasut, trawlbasit, tunisassiorfimmi aqutsisut imaluunniit tunisassiorfinni siulittaasut, 65-t sinnerlugit ukioqalissapput, taamaalillutillu soraarninngorlutik.
Royal Greenlandip aalisarnermut piniarnermullu naalakkersuisoqarfimmut nalunaarusiami nassiussaani tamanna atuarneqarsinnaavoq.
Inuttanit 476-iusunit 33 procentit 2030-imi 65-it sinnerlugit ukioqalissapput, inuttat aamma teknikerit 130-iusunit 31-t ukiut qulit qaangiuppata 65-t sinnerlugit ukioqalissapput.
Ilinniakkamik naammassinnittut nutaat amerliartornerat
Naatsorsueqqissaartarfiup kisitsisaataat naapertorlugit maskinmesterit arfineq-marluk aamma maskinistit arfinillit Kalaallit Nunaanni avataanilu piffissami 2003-2015-imi ilinniakkaminnik naammassinnissimapput, umiarsuillu naalagaat 1. gradit ima amerlassuseqarput:
Inuttat kinguaariit tulliisa nutaat Royal Greenlandip nalunaarusiaa naapertorlugu inuttat soraarninngortut amerlassusaannut malinnaasinnaanngillat, angallammi naalakkatut, aquttutut, mistalitut assigisaanilluunniit allagartartaarneq naammanneq ajormat.
- Angallammi naalakkatut, aquttutut, mistalitut assigisaanilluunniit ilinniakkamik naammassinnereernerup kingorna taakku arlaattut atorfinilertupallassinnaanissaq tamatigut qulakkeerneqarsinnaaneq ajorpoq. Tassa qaammatit arlallit allaallumi ukiut arlallit aatsaat qaangiutereeraangata ilinniagarisimasaq tunngavigalugu atorfinittoqarsinnaasarpoq. Tassa imaappoq, atorfiit matumani pineqartut ilaannik atorfittaarnissamut piumasaqaatit eqquutsissinnaajumallugit inuussutissarsiutigalugu imaani angalanermut uppernarsaatinik allagartanillu allanik akuersissutinik peqarnissaq piumasaqaataavoq, nalunaarusiami tamanna allaqqavoq.
Namminersorlutik Oqartussat oqaloqatiginissaat kissaatigigaat
Royal Greenland naapertorlugu, Tassa imaappoq, kilisaatini avataasiutini inuttat ukiuni tulliuttuni tallimaniit 15-ini paarlanneqartussat amerlasaroorujussuusussaassapput:
- Imarsiornermik ilinniarsimasut Kalaallit Nunaanneersut ikippallaarmata kilisaatit avataasiutit inuttassaaleqinissaat pakkersimaarneqarsinnaanngilaq. Soraarninngortussat amerlammata ilinniarsimasut soraarninngortussanut paarlattaasinnaasut ikippallaarput.
- Taamaattumik inuttassaaleqisoqaleriarpat umiarsuaatileqatigiiffiit sulinermi atugassarititat tungaatigut akimmiffeqalissapput tamannalu ilutigalugu inuttalersuineq pillugu nalunaarutip naleqqussarneqarnissaa pisariaqalissaaq.
Taamatuttaaq umiarsuaatileqatigiiffiit isumaqarput Namminersorlutik Oqartussat imarsiornermik ilinniakkanut tapersersuinerat naammanngitsoq.
- Nunatsinni Imarsiornermik Ilinniarfeqarpoq/Umiartornermik Ilinniarfeqarpoq. Taamatuttaaq nunatsinni imarsiornermik ilinniarsimasunik nunaqavissunik inuttalersuisalernissaq qulakkeerumallgu imarsiornermik ilinniarfiit allat soorlu maskinalerisutut, mistalitut fiskeriteknologitullu ilinniarfiusinnaasunik pilersitsisoqarnissaa pisariaqarpoq. Ilinniarfiusinnaasunik pineqartunik pilersitsisoqarpat kilisaatinut avataasiutinut, sinerissap qanittuani aalisariutinut minnerunngitsumillu nunami tunisassiorfinnut inuiaqatigiinnullumi iluaqutaalluinnartussaavoq, nalunaarusiami tamanna allaqqavoq.