Royal Greenlandimut tapiissuteqarneq isoraat
Aalisakkanik nioqqutssiortartut peqatigiiffiata "Dansk Fisk"-ip Folketingimi politikerinut sianigeqquaa Kalaallit Nunaannit naapertuilluanngitsumik unammillerneqarneq. Royal Greenlandip Namminersorlutik Oqartussanit tapiiffigineqarsimanera taakku isoraat.
"Dansk Fisk"-ip Folketingimi politikerinut sianigeqquaa Kalaallit Nunaannit naapertuilluanngitsumik unammillerneqarneq, taamatut allappoq Vejle Amts Folkeblad.
Royal Greenland Namminersorlutik Oqartussanit milliardip affaanik tapiiffigineqarpoq, tamannalu isornartoqarpoq, Dansk Fiskip siulittaasua isumaqarpoq.
– Qallunaat aalisarnermik suliffissuaqarfiat ukioq manna 4 millioner koruuninik tapiiffigineqarsimavoq, taakkunannga 2 millioner koruunit EU-meersuullutik, taamaattumik matumami pineqarpoq qallunaat suliffissuaqarfiata tamavimmi 2 millioner koruuninik tapiissuteqarsimanera Kalaallit Nunaanni ingerlatsivik ataasiinnaq milliardip affaanik tapiiffigineqartoq, Dansk Fiskip siulittaasua Jens Tellefsen Vejle Amts Folkebladimut oqarpoq.
Siulittaasup ersissutigaa Royal Greenlandimut taamatut annertutigisunik tapiissuteqarnikkut qallunaat ingerlatsiviisa ingerlalluartut ajoquserneqarsinnaanerat, naggataatigullu qallunaat aalisarnerisa ajoquserneqarsinnaanerat.