Royal Greenlandip pisortai Mútep sakkortuumik avoqqaarpai
Naalakkersuisut siulittaasuat Múte B. Egede Royal Greenlandip ataatsimeersuarnerani sakkortuumik oqaaseqarpoq, taamaaliorneranilu ingerlatseqatigiiffiup siunnerfia akileraarutinut akiliinissaq sioqqullugu 255 million koruuninik amigartoornermik kinguneqartoq, naammaginngikkaa kialuunniit qularutigisinnaajunnaarpaa.
Naalakkersuisut Siulittaasuat Múte B. Egede uani Royal Greenlandip ataatsimeersuanik ammaalluni oqalugiarpoq.
Leiff Josefsen
Royal Greenlandip qullersaqarfia Kalaallit Nunaanni katersorneqartariaqartoq, “ingerlatseqatigiiffiup qullersaqarfiata Kalaallit Nunaanni inissisimasussaaneranut isumaq” Múte B. Egedep oqalugiarnermini erseqqissaatigaa.
Pisortat suliassartik tamanna naammattumik pingaartissimanngikkaat oqarpoq, taamaattoqarneratalu Naalakkersuisut taama oqariartornerat pisortat pinngitsoornatik malissagaat erseqqissaavoq.
Royal Greenlandip Chilemi siorna 85 million koruuninik amigartoortumik aningaasaliisimanerat Naalakkersuisut aamma iluarinngilaat.
- Ilumoorsinnaanngilarmi inuiaat kalaallit ingerlatseqatigiiffiutaat nunatsinni suliassamik aaliangersimasumik kivitaqartussaq, tunisassiaminullu toqqaannaq attuumassuteqanngitsunik nunatta avataani soorlu Chilemi aningaasaliisarnissaa millionilippassuarnik annaasaqaataasumik, Múte B. Egede immikkoortumik tassannga akuersaanngivissoq oqarpoq, aalisartitseqatigiiffimmi “pissusissamisoortumik - Kalaallit Nunaanni aamma Atlantikup Avannaani inissisimammat".
Ingerlatseqatigiiffiup akiitsorpassui annikillisinneqartariaqartut, siunissamilu aningaasaliinerit Kalaallit Nunaanni, ingerlatseqatigiiffiup angerlarsimaffigisaani, ingerlatanik annertusaasuunissaat ilanngullugu erseqqissarneqarpoq. Oqalugiarnermini sukkavallaamik oqalunnini pissutigalugu nutserisup malinnaaniapiloorneranik Royal Greenlandimi sulisumit oqarfigineqarpoq.
- Uanga tamanna ajornartorsiutissarinngilara, Múte B. Egede sukannersumik oqarpoq, oqalugiarninilu isornartorsiuinermik ulikkaartoq kigaallanngivilluni nangillugu.
Múte B. Egedellu qanoq ulapputeqartiginera, taassuma aningaasaqarnermullu naalakkersuisup Erik Jensenip pisortaanerup Susanne Arfelt Rajamandip oqalugiaataa sioqqullugu ataatsimeersuarnermit qimagunnerannit takuneqarsinnaavoq.
Royal Arctic Line Air Greenlandilu ataatsimeersuarput, tassanilu piginnittuunermut politik nutaaq, fraud management ingerlatseqatigiiffiullu inuiaqatigiinnut tunngatillugu piujuartitsisuunissaa assigiimmik erseqqisaassutigineqarput.Tamakku Royal Greenlandip ataatsimeersuarnerani inissaqarsimanngillat, tamannalu Múte B. Egedep aallarniilluni oqaaseqarnerani tusarneqarsinnaavoq.
- Ukioq unammillernartortaqarsimavoq. Oqarluaannaraanni ajorluinnarsimavoq.
Royal Greenland kaaviiaartitatigut sulisutigullu uuttornerani Kalaallit Nunaanni suliffeqarfinni annersaasoq oqaatigineqarpoq, aalisarnermillu inatsisikkut nutaakkut inuiaqatigiinni kalaaliuni “suliassani naammassisariaqarai” erseqqissarneqarpoq.
Naggasiullugulu Múte B. Egedep “ingerlatseqatigiiffimmi siulersuisut, pisortaatitat minnerunngitsumillu sulisut ukiuni aggersuni sulilluarnissaannik kissaappai”.
