Royal Greenlandip Tysklandimi ingerlatsivini tunivaa

- Royal Greenlandip Sahra Investment Group Private Limited aamma Meridian Investment Group Pte. Ltd. isumaqatigiissuteqarfigigallarsimavai, taakkua ataatsimoorlutik, isumaqatigiissuteqartoqavinnissaa apeqqutaatillugu, Royal Greenland Seafood GmbH-mi aktiatigut aningaasaatit tamarmiusut pisiarissallugit, tassanilu pineqarput Tysklandimi Wilhelmshaven-imi aalisakkanik tunisassiornermik ingerlatsinermi ingerlatat pingaarnerpaat ingerlatsinikkullu sammisat, ilanngunnagilli Tysklandimi Cuxhaven-imi nipisat suaannik tunisassiornermik ingerlatat, aammalu zip-lock/chain-pack-imik ingerlatat.
Taamatut Royal Greenland tusagassiorfinnut nalunaarutikkut allappoq.
Taamatut nuussisoqassappat illua'tungeriit tamassuma ingerlannissaanut periarfissat maanna misissorpaat.
Misissuinerup tamassuma ilaatut illua'tungeriit aamma isumaliutigaat ataatsimut tuniniaavimmik pilersitsinissartik, europami tuniniaavinnut aalajangersimasunut tuniniaanermik ingerlatsisussaq ´atuisartunut qanimut attaveqarneq attatiinnarumallugu nukittorsarumallugulu´, aammalu Wilhelmshavenimi suliffissuarmit aamma Royal Greenlandip tunisassiornermik ingerlatsivianit nioqqutissanik piumaneqartunik pissaqartitsisinnaajumalluni.
- Wilhelmhavenimi ingerlatanik tunisiniarneq Royal Greenlandip pingaarnerusumik periuseriniagaanut naapertuuppoq, tassa niuerfiit, suliffeqarfissuup pilersuinermi akuleruffigisai sammineqassasut, pingaartumik tunngavillit artinik atlantikup avannaaneersunik, Royal Greenlandip Kalaallit Nunaanni pisarisartagaanik pisiarisartagaanillu, Royal Greenlandip pisortaanera Mikael Thinghuus oqarpoq.