Rubinisiortoq siulleq
Napaartoq Wilche rubininik ujaasinissamut siullersaalluni akuersissummik tunineqarpoq.
Taamatut allappoq AG.
Rubinisiortartoq akuersissummik tunineqarpoq, ukioq manna siusinnerusukkut malittarisassat allanngortinneqarnerisa kingorna atortussiassanik, ujaqqanik erlinnartunik il.il. annikitsumik ujaasinissamut qinnuteqartoqarsinnaalermat.
Taamaasilluni ujaasiffissap annertussusissaa 1 kvadratkilometerinut killilerneqarsimavoq akuersissullu sivisunerpaamik ukiunut marlunnut tunniunneqarsinnaavoq. Ujaasinermullu atatillugu atortut oqitsut kisimik atorneqarsinnaapput, assersuutigalugu qillerut silaannarmit ingerlasoq aamma sequtserutit tigumiartakkat.
Rubinisiortup sumerpiaq ujaasinissaminut akuerineqarsimanerluni oqaatigiumanngilaa. Napaartoq Wilchep piumanngilaa inuit rubininik naammattumik ilisimasaqanngitsut ujaqqanik erlinnartunik ujaasilernissaat - taamaasillunilu rubinit aserorsinnaallugit.