Ruslandimut kinguneqartitsinerit: Aalisarneq maannamut eqqugaanngilaq
Ruslandimut kinguneqartitsinerit Nunatsinni inuussutissarsiutigineqartuni assigiinngitsuni kinguneqarsinnaasoq, Sulisitsisuni pisortaq Christian Keldsen erseqqissaavoq.
Naalakkersuisut Siulittaasuat Múte B. Egede Ruslandimut kinguneqartitsinissaminut piareersimavoq. Tamanna pivoq Rusland Ukrainemut sisamanngornerup unnuaani saassussereersorlu.
Killilersuinerit sorpiaat pineqarnersut Múte B. Egedep annertunerusumik ilisimatitsissutiginianngilaa. Naalakkersuisoqarfiatalu paasissutissiissutigaa inuussutissat pillugit inatsit maannamut EU aqqutigalugu ingerlanneqartoq suli eqqorneqanngitsoq. Pisullu allanngoratarsinnaasut erseqqissaatigineqarpoq.
Inuussutissat pillugit inatsit Ruslandimut kinguneqartitsinermut atorneqassappat Sulisitsisut annertuumik eqqorneqarumaartut, Sulisitsisuni pisortaq, Christian Keldsen erseqqissaavoq.
- Kalaallit Nunaat Ruslandimut 580 millionit koruunit nalinganut ukioq kingulleq nioqquteqarpoq. Nunatsinni avammut nioqquteqarnerup 13-14 procentiisa missaaniippoq. Inuussutit pillugit inatsit Ruslandimut kinguneqartitsinermut atorneqassappat annertuumik nunatta inuussutissarsiorneranut kinguneqarsinnaavoq, taanna Sermitsiaq.AG-imut oqarpoq.
Nunarsuarmi aningaasaateqarfiit eqqugaasinnaapput
Ruslandimut nioqquteqarnerit Corona sioqqullugu annikinnerulaarsimagaluarput, corona pissutaallunimi Asianimut nioqquteqarneq unikaallatsinneqarsimavoq, Ruslandilu nunanut allanut niuertariaqalersimalluni.
Inuussutissat pillugit inatsit killilersuinernut atorneqartinnagit kinguneqartitsinerit annertunerusumik nunatsinnut sunniuteqarnavianngillat. Allatigullu sunnerneqarsinnaasugut Christian Keldsen nassuiaavoq.
- Maanna aningaasaateqarfiit akileeriaatillu (Swift) kinguneqartitsissanersut eqqartorneqarpoq. Swift aqqutigalugu nunamiit nunamut aningaasunut nuusipallattoqarsinnaavoq. Tamakkua atorlugit kinguneqartitsisoqalerpat taava suliffeqarfiit nassiussaat akilerneqarnissaanut ajornartorsiortoqalersinnaavoq, pisortaq oqarpoq.
Suliffeqarfiit arlallit Ruslandimi atorfilittaqarput
Kinguneqartitsinerit massakkut atulersinneqartussat kingusinnerusukkut sunniuteqarsinnaasut, Christian Keldsen erseqqissaavoq.
- Kalaallit Nunaata nalilersortariaqarpaa kikkut uani tapersersussanerlugit. Kukkusumik tapersersuisoqarpat ukiorpassuarni avammut niuerneq eqqorneqarsinnaavoq. Kalaallit Nunaaniit avammut nioqquteqarnerit ukiuni marlunni, tallimani qulinilluunniit ingerlakkusuppagut.
Ruslandimut kinguneqartitsinermi allat aamma sunniuteqarfigineqarsinnaapput, Ruslandimi nunarsuarmi orsussanik annertuumik nioqquteqartuuvoq.
Orsussat inuussutissarsiutillu allat akii qaffassinnaapput. Tamannalu nunatsinni inuussutissarsiutitigut malugineqarsinnaajumaartoq, Christian Keldsenip oqaatigaa.