Russit umiarsuaat Sisimiuni tunisassiorfiusimasoq aallarpoq

Russit umiarsuaat tunisassiorfik Katherine Murmanskiminngaanneersoq, juunip qaammataanili Sisimiuni tunitsivittut atuutereerluni maanna Norgep tungaanut aallarpoq.

Katherinep Sisimiut qimallugu aallarpoq saarullinnik tunisisinnaaneq unimmat.

Umiarsuaq, Sisimiut eqqaanut 2010-mi pisoq umiarsuaatileqatigiiffiup piginnittaata Norgep avannaanut Trommsømut ingerlaqqinnissaa aalajangiuppaa, Aquttoq Miklashov Gennadiy, oqarpoq.

Kathrine Tromsømi qaammatip ataatsip missaani amoqqariarluni Tromsøp avannaani tunitsivittut atorneqaqqilissaaq.

- 2010-li aasakkut Sisimiut eqqaanut pivugut, piffissap ilaa saarulliunerusunik aalisagaqarluartarpoq, aquttoq Miklashov Gennadiy oqaluttuarpoq nangilunilu:

– Maajip qaammataanit septembarip aallartinnera ilanngullugu tunisineq pitsaanerpaamik ingerlavoq. Tuniserusuttut ima amerlatigipput allaat Kangaamiut Seafood juunip naaneraniit juuli ilanngullugu islandimiut kilisaataanik tunisassiviutigisumik attartortariaqarsimalluni.

- Islandimiut umiarsuaanni aquttoqatigara oqaloqatigisaqaara tamattami Kangaamiut Seafood sinnerlugu tunisassioratta.

- Sisimiuniittoq Sisimiut Fish suleqatigilluarparput taakkua tunisinissanik aaqqissuussinermik ingerlatsimmata, aquttoq Miklashov Gennadiy paasissutissiivoq. Piffissaq tamaat Sisimiut Fish siunnersuisartumik umiarsuarmiititaqarpoq, taamaasilluta nunaqavissut aalisariutaannik attaveqaqatigiinneq ajornartorsiutitaqanngitsumik ingerlanneqarpoq.

Aquttoq russiusoq oqaluttuarpoq Kangaamiut Seafood aalisakkat 1000 tonsit pissarsiarisimagai, taakkua saarulliupput, suluppaakkat aammalu qeeqqat.

- Juunimiit maannamut 800 tons tunisassiaralugit nalunngilara. Islandimiut kilisaataata 250 tons miss. naatsorsuutigaara. Taamaattumik katilluta 1000 tons aalisakkat tunisassiarisimassavagut, aquttoq Miklashov Gennadiy oqarpoq.

Maanna taassuma inuttaasalu Kangaamiut Seafoodimit aningaasarsinissartik utaqqivaat orsersorlutillu. Tamatuma kingorna ullut 16 imal. 17 atorlugit umiartortut 20 Tromsøp tungaanut angalassapput.

Aquttoq Miklashov Gennadiy ilisimatitsivoq nammineq inuttamilu Kalaallit Nunaanniinnertik nuannaarutigalugu.