Saarulleqassuseq isumaqatigiinngissutaangaartoq

Saarullinniarneq pillugu aqutsinissamut pilersaarummi nutaami siunnersuutigineqartut ilagaat suffinerit nalaani saarullinniarnerup unitsinneqarnissaa, pisassiissutillu biologit siunnersuutaannut naleqqussarneqartarnissaat.

Maanna aqutsinissamut pilersaarut tusarniaassutigineqarpoq.

Ukiorpassuarni ilisimatuut siunnersuutaat qaangersimalluinnarlugu saarullinniarneq aqunneqartarpoq, maannalu aalisartorpassuit saarullinniartarneq inuussutigaat.

Suleqatigiissitat aalisarnermit, Pinngortitaleriffimmit Namminersorlutillu Oqartussanit atorfilittaasunik aallartitallit ukiup ataatsip ingerlanerani aqutsinermut pilersaarut suliarisimavaat, Kalaallit Nunaatalu eqqaani saarulliit qassiunersut isumaqatigiinngissutaangaartoq, tassani takuneqarsinnaavoq:

- Saarullinnik isumalluutip qanoq annertutiginera akerleriittumik paasineqartarpoq. Siunnersuutigineqartunit saarulleqarnerusoq sinerissap qanittuani avataasiorlunilu aalisartut isumaqarput, tamannalu aqutsinissaq pillugu suliaqarnermi annertuumik eqqartorneqartarsimalluni, Naalakkersuisut pilersaarummut tusarniummi allapput.

Pisassiissutit nalimmassarneqartuarneqassasut

"Saarullinniarnermi inuuniarnikkut soqutigisat, inuiaqatigiit aningaasaqarniarnerat aammalu siunissaq eqqarsaatigalugu uummassusilinnik piujuartitsinissaq" tunngavigalugu sinaakkusiiniarluni pilersaarut suliaavoq. 

Saarulliit qanoq amerlatiginerat isumaqatigiinngissutaammat aalisartorpassuillu saarulliit inuussutigimmatigit, pisassiissutit ukiut tamaasa qanoq allanngortigisarnissaat naatsorsorneqartariaqarsimavoq:

- Sinerissap qanittuani aalisarneq aalisartunut aalajangiisuulluinnarpoq, taamaattumillu ukiumit ukiumut TAC-p nikerarsinnaaneranik piumasaqarneq ilanngunneqarsimalluni. TAC-p ukiumit ukiumut annertunerpaamik 10 %-inik allanngortinneqartarsinnaasoq aalajangiunneqarpoq, tusarniummi allassimavoq.

Suffinerit nalaani aalisartoqartassanngitsoq

Pilersaarummi siunnersuutigineqartut ilaat tassaavoq, piffissami marsip aallaqqaataanit maajip 31-ata tungaanut suffisarfinni aalisartoqartannginnissaa.

- Suffinerit nalaani suffisarfiit matoqqatinneqarnerisigut saarulliit pitsaanerpaamik amerliartorsinnaalissasut ilimagineqarpoq, tamatumalu kingunerissaavaa piffissap ingerlanerani saarulleqassutsip siuariarsimanera, tunngavilersuutaavoq.

Aalisartut ilisimasaasa ilanngunneqarnissat siunertaralugu ukiumoortumik saarullinnut nalunaarusiortoqartarnissaa, nalunaarusiarlu taanna aalisarneq pillugu paasissutissanik aalisartullu nalunaarutaannik imaqartarnissaa, Naalakkersuisut aalajangerpaat.

Aqutsineq pillugu pilersaarusiaq nutaaq septembarip 30-ata tungaanut tusarniaassutigineqarpoq. Pilersaarut tamarmi uani atuarneqarsinnaavoq.