Saarulliit pillugit ajornartoorneq: Royal Greenland KNAPK-mik suleqatiginnikkusulluni aasarli utaqqivoq
Taamaattorli KNAPK suli manna tikillugu suleqatigiinnissamut isumaqatigiissutissatut missingiummut qisuarianngilaq, nukiilli atorusinnerusimavai ingerlatseqatigiiffimmut sammisitamik akerliussutsimik takutitsinissaminut. RG suli tunniutiinnanngilaq, ingerlatseqatigiiffimmi neriuuteqarpoq ataatsimoorfissamik nassaartoqassasoq.
Sermitsiaq.AG-mit allagaatimik takunnippugut, taanna allagaat ersersitsivoq Royal Greenland 15. junimi aasaq mannali KNAPK-mit qisuariartoqarnissaanik utaqqisoq suleqatigiinnissamik isaassinini pillugu.
Ingerlatseqatigiiffiup erseqqissaatigaa, KNAPK-mi suleqateqarsimaneq pitsaasoq nanginneqassasoq kissaataasoq, aammalu ingerlatseqatigiiffik piareersimasoq aalisarnermik inuussutissarsiuteqarnerup iluani unammilligassat pillugit oqaloqatigiinnerit aqqutigalugit suleqatigiittoqassasoq:
- Taamaammat 15. juni 2023 suleqatigiinnissamut tunngavissatut missingiusiarput tunniunnikuuarput. Qilanaarpugullu KNAPK-mit akineqarnissatsinnut. Sinerissap qanittuani aalisarnermi siuarsaanissaq siunertaralugu ataatsimoorluni soqutigisat siuarsarneqarnissaannut suleqatigiinnikkut ataatsimoorussinnaagatsigit.
Taamaattorli Sermitsiaq.AG-mit paasisavut naapertorlugit Royal Greenland KNAPK-mit akineqarnissaminik utaqqivoq.
RG naapertorlugu suleqatigiissutigineqarsinnaasut
Royal Greenland allakkamini suleqatigiissutigineqarsinnaasut assigiinngitsut saqqummiussorpai:
- Suleqatigiissutissatut missingiummi suleqatigiissutigineqarsinnaasut tulleriaarlugit nalunaarsugaapput, ilaatrigut sinerissamut qanittumi aalisarnermi aaqqiissutissat pillugit suleqatigiinneq, aalisariaatsit nutaat, pisuussutit atorneqanngitsut atorneqarsinnaalernissaat, qassutaarsiutit allallu aalisarnermi atortut imaanut annaasat katersorneqarnissaat aammalu aalisarnermi akuersissutit pillugit suleqatigiinneq, RG-p tungaanit suleqatigiissutissatut assersuutitut atorneqarput.
- Royal Greenlandip tungaanit naleqartitatsinnut ilaavoq kattuffinnik suleqateqarnissaq, taannalu aqqutigalugu suleqatigiittut akunnitsinni Kalaallit Nunaanni aalisarneq pillugu ilisimasavut annertunerulersissagatsigit. Tamanna Kalaallit Nunaannut aalisartunullu aamma iluaqutissiissasoq qularinnginnatsigu.
Akit isumaqatigiinniutigineqassanngitsut
Naak massa RG-p tungaanit KNAPK allallu aalisarnermik inuussutissarsiuteqarlut kattuffii qanimut suleqatigerusunneqaraluartut, ingerlatseqatigiiffik erseqqissaateqarpoq, akit pillugit isumaqatigiinniartarnerit suleqatigiinnissamik isumaqatigiissutini ilanngunneqaqqissanngitsut kissaataavoq.
Tassunga tunngatillugu ingerlatseqatigiiffik erseqqissaateqarpoq akit pillugit isumaqatigiissuteqartarnerit isumaqatigiissuteqartarnerillu naleqqukkunnaarsimasut, tassani innersuussutigineqarluni akit niuffannermi akinit aqunneqarmata aammalu Kalaallit Nunaanni tunisassiortut akornanni unammilleqatigiinneq annertusiartormat.
Suleqatigiinnissamik isumaqatigiissutissatut missingiummi akit pillugit isumaqatigiinniartoqaqqinnginnissamik isumaqatigiissuteqaqqinnginnissamillu ilanngunneqarsimanera KNAPK-p RG-mut akissuteqarsimannginneranut pissutaanersoq pillugu suli akissutissarsinngilarput.
KNAPK-mit qisuariartoqarnissaa Sermitsiaq.AG-mit sulissutigaarput.