Saarullittassiissutit assortuussutaasut Naalakkersuisut Royal Greenlandimut tunniuppaat
Tunumi saarullinnut 5.515 tonsit aamma suluppaakkat 406 tonsit Naalakkersuisut pisassiissutigaat. Illuanik Royal Greenland pisassinneqarnermini Tasiilami fabrikkiliussaaq.
Suliap sivisuumik allanngorartumillu suliarineqarnerata kingorna, Naalakkersuisut Tunumi avataasiorluni saarulliit 5.515 tonsit Namminersorlutik Oqartussat kilisaataatileqatigiiffianut Royal Greenlandimut pisassiissutigai.
Naalakkersuisut tusagassiuutinut nalunaarummi taama ilisimatitsipput, tassani aalisarnermik ingerlatsivissuup illuani pisassiissutinik pissarsinermini Tasiilami fabrikkiliornissaa pingaartinneqarpoq. Fabrikkimi inuit arfineq-marluk tikillugit sulisorineqassapput.
- Naalakkersuisut pingaartilluinnarpaat Tunumi aalisarnerup suliffissaqartitsiniarnerullu qulakkeerneqarnissaat. Taamaattumik nuannaarutigaara Tunumi tulaassinikkut tunisisinnaanissamut periarfissat pitsaanerulissammata, Aalisarnermut Piniarnermullu Naalakkersuisoq Karl Tobiassen taama oqarpoq.
Aallaqqaammut Royal Greenland fabrikkip piareernissaata tungaanut allamik tunitsiviusinnaasumik nassaartariaqarpoq. Naalakkersuisut fabrikkimut tunngatillugu qanoq iliortoqarsimaneranik uppernarsaammik piumasaqarniarput.
Qinnuteqartitsineq Transparencymit isornartorsiorneqartoq
Saarullittassiissutit pillugit suliaq ukioq manna siusinnerusukkut aallartippoq, Naalakkersuisut suliaqartumut nutaamut 7.515 tonsinik pisassiissuteqarniarnerat isornartorsiorneqalermat. Ingerlatseqatigiiffiit marluk pisassiissutinut qinnuteqarput.
Apriilip aallartinnerani Naalakkersuisut suliami allatut isumaqalerput, pisassiissutillu qinnuteqaatigitippaat – taakkuli 2.000 tonsinik apparneqarput.
Qinnuteqartitsineq ilaatigut peqquserluttuliortoqannginnissaanik suliniuteqartunit Transparency International Greenlandimit (TIG) isornartorsiorneqarpoq, taakku Naalakkersuisut nutaamik periuseqarlutik sooq pisassiissuteqarnissaannik nassuiaammik amigaateqarput.
Assingusumillu Sulisitsisut aalisarnermut ataatsimiititaliaani siulittaasumit, Henrik Lethimit isornartorsiorneqarpoq, taassuma qinnuteqartitsineq inatsisinik unioqqutitsinerarpaa.
Peqqissaartumik suliarinnittut
Naalakkersuisut nalunaarutaanni Royal Greenlandimut pisassiissutinik tunniussineq ”kinaassusersiunngitsumik nalilersuutinik” tunuliaquteqarluni pisimasoq atuarneqarsinnaavoq. Royal Greenlandilli pisassiissutinik suna pissarsineranut tunngaviusimanersoq ersarinnerusumik oqaatigineqanngilaq.
Sermitsiaq.AG-p paasissutissaatai naapertorlugit, tunisinermut, tunisassiornermut aamma suliarinninnermut kiisalu pisassiissutit tunngaviinut aamma inissaqartinneqarnerinut qinnuteqartitsinermut piumasaqaatinut pilersaarutinut qinnuteqaatit qanoq naammassinnissinnaassuseqarneri malillugit, pisassiissutit tunniunneqarsimapput.
Royal Greenland qinnuteqaatinit arfineq-pingasuusunit toqqarneqarpoq, aalisartitseqatigiiffiit uku aalisalerniassallutik qinnuteqarput: Qaleralik A/S, Sigguk A/S, Polar Seafood Greenland A/S, Royal Greenland A/S, Malik Seafood/Arsuk Food ApS, Norsaq A/S, Tuukkaq Trawl A/S aamma Sermiligaaq Fish ApS.
Qinnuteqaatit marluk neqeroortitsinermi piumasaqaatinik naammassinnissinnaasimanngillat.