saarulliit
Saarullittassiissutit siunnersuutigineqartunit pingasoriaammik amerlanerupput
Saarullittassat Naalakkersuisut ilaqqippaat
Aalisartut ukioq naallugu aalisarsinnaasariaqarput. Taamaammat Naalakkersuisut sinerissap qanittuani aalisartut saarullittassaat 1.400 tonsinik ilaqqippaat.
Ukiumullu maanna aalisarneqartussat katillugit 34.400 tonsiulerlutik. Saarullittassat 12.379 tonsiunissaat Pinngortitaleriffiup 2017-mut kaammattuutigai. Piujuaannartitsinissamullu aalisarneqartussanit siunnersuutigineqartut maanna pingasoriaataat aalisarneqartussanngorlutik.
Oktoberimi ilaneqarput
Saarullittassanik qaffaaneq kingullermi oktoberimi pivoq. Tassani aalisarnermut piniarnermut nunalerinermullu naalakkersuisuunikup Nikolaj Jeremiassenip (S) 8.000 tonsinik qaffaaffigalugit.
Oktoberimi aalisagartassat amerlinerinik ukiup sinnera aalisarsinnaanissaq siunertarineqaraluarpoq. Tamannali ukiortaap tungaanut naammanngitsoq maanna paasinarsimmat naalakkersuisup taartaata Hans Enoksenip (PN) pisassat 1.400 tonsinik ilavai.
Aappaagu ikinnerunissai ernummatigaat
Oktoberimi saarullittassanik qaffaasoqarmat Pinngortitaleriffiup ukioq manna saarulleqarluarnera eqqumaffiginerarpaa. Aappaagumullu saarulliit amerlassusaat ikileriarnissaat ernummatigalugu.