Saattuanik suliffissuaq aallartilluartoq
Narsaq Seafoodimut saattuanik tunisineq ingerlalluartorujussuuvoq 12-inillu sulisoqartitsilluni, sulilu amerlanerusunik sulisoqalernissaq pilersaarutigineqarluni.
Saattuanik suliffissuaq Narsaq Seafood, Kunuk Albrechtsen pisortaralugu, aallartilluartorujussuusimavoq. Saattuanik tunisineq ilimagisamit ingerlalluarnerujussuuvoq, suliffissuullu ammaneqarnerata kingorna sapaatit akunneri pingasut qaangiuttut suliffissuaq 12-it missaannik sulisoqarpoq, amerlanerusunillu sulisoqalernissaq pilersaarutigineqarpoq.
Narsaq Seafoodip pisortaa Kunuk Albrectsen oqarpoq, aallartinneq pitsaasuusimasoq ulapinnarsimaqalunili.
- Suliffissuup ulloq unnuarlu saattuat 3 1/2 tonsit missaanniittut tunisassiarisinnaavai, ullulli ilaanni 5 tonsit angullugit tunisassiortarpugut, taamaattumik aallartilluarsimaqaagut, Kunuk Albrectsen oqarpoq.
Tamatuma saniatigut pisortap Kunuk Albrechtsenip oqaatigaa SIK-p suliffissaqartitsinermut aningaasaateqarfiata suliffissuaq tapersersorsimagaa 200.000 koruuninik taarsigassarsitillugu 100.000 koruuninillu tapiissuteqarfigalugu, aammalu Narsaq Seafood A/S-ip SIK-mik isumaqatigiissut atsiorsimagaa.
Narsami suliffiit nutaat Inuussutissarsiornermut ataatsimiititaliap nuannaarutigai naammagisimaarlugillu.
- Inuussutissarsiornermut ataatsimiititaliami iluarisimaartorujussuuvarput Narsaq Seafoodip taamatut aallartilluartigisimanera. Suliffissaaleqisut ilaannut suliffissaqartitsilerpoq illoqarfimmiullu tunisisinnaalerput, aalisartuvut aningaasarsiorsinnaanerulerlutik. Iluatsilluartorujussoorpasippoq suliniullu pitsaasorujussuuvoq. Taamaattumilk ingerlatsivik pitsaasunik tamanik kissaapparput, Inuussutissarsiornermut ataatsimiititaliap siulittaasua Kalistat Lund oqarpoq.