Sanaartornermi aalajaatsuunissaq teknikkikkut siunnersortit kissaatigaat

- Sanaartornerup ingerlaannarnissaanik patajaatsuunissaanillu qulakkeerinninnissaq Inatsisartunut ilaasortanngortussat suliassaraat.

Inatsisartunut qinersisoqareerpat kissaatit pillugit Sermitsiap aperimmani Inuplanimi pisortaq Sulisitsisullu teknikkikkut sulialinnut siunnersuisartunut ataatsimiitsitaliaani siulittaasoq Ujarak Rosing Petersen akivoq.

- Ukiorpassuarni sanaartornerit ingerlalluareerneranni maanna sanaartornerit unittooriartornerat ikiliartornerallu malunnarpoq. Sanaartornerup tungaatigut allanngorarnerit annertuut iluaqutaanngisaannarput, aamma uagutsinnut sakkortuumik eqquissapput. Taamaattumik Inatsisartut sanaartornerup ataavartuunissaa sulissutigissagaat neriuutigaarput. Pisariaqartitsisoqarpormi – inissarsiortut allattorsimaffiat takivoq nutarterisoqarnissaalu pisariaqarluinnarluni — siunissamullu ungasinnerusumut pilersaarusiornermi politikerit sanaartornermik suliaqartut suliassaqaannarnissaannik qulakkeerinneqataasinnaapput.

Suliassaqarfik immikkuullarissoq

Kalaallit suliffeqarfiutaat teknikikkut siunnersuisartut immikkuullarilluinnarput, taakku kalaallinik sulisorpassuaqarlutik.

- Teknikikkut siunnersortitut sulisut immikkut ittuupput, ilaatigut kalaallit ilinniagaqarluartut immikkut ilisimasallit amerlasuut sulisorineqarnerat ilisarnaatigalugu, Ujarak Rosing Petersen oqarpoq, taanna Issittumi ingeniøritut ilinniagaqarsimavoq.

- Taamaattumik siunissami Kalaallit Nunaata aningaasaqarnerani imminut napatissinnaasumi inuussutissarsiutitut pingaarutilittut inissisimavugut, tassami amerlanerit nunaqavissuupput ilinniagartuujullutillu.

- Siunissaq ungasinnerusoq eqqarsaatigalugu politikerit inissialiornissamik pilersaarusiornissaat kissaatigaarput. Sanaartornermik suliaqartarpugut piffissamik sivisuumik pilersaarusiortarluta, sanaartornerummi piviusunngortinnissaa sivisusinnaasarmat – tamannalu Inatsisartunut ilaasortanngortussat tapersersorsinnaavaat.

Sanaartornermut malittarisassat nutaat

Allat politikerinit qinigaaqqammersunit isummerfigineqarnissaat Ujarak Rosing Petersenip aamma kissaatigaa. Kalaallit Nunaanni sanaartornermut malittarisassat nutaat ukiorpassuarni oqallisigineqartarsimapput – tassanilu politikerit suliassaqarput.

- Politikerit qinigaaqqammersut suliassaasa pingaarutillit ilaat alla tassaavoq Kalaallit Nunaanni sanaartornermut malittarisassat nutaat. Inatsisissatut siunnersuutip kingulliup tamanut tusarniaassutigineqartup danskit periaasiat malillugu uppernarsaasersornerit arlallit atuutilersissagai allassimavoq, Ujarak Rosing Petersen oqarpoq.

- Tamanna mianersoqqussutigerusuppara. Kalaallit Nunaanni pissutsinut naleqqussarneqanngilaq, aamma aaqqissuussaq Danmarkimit aallaaveqaraluartoq Danmarkimi uppernarsaatinik tunniussisarneq ajornartorsiuterpassuarnik pilersitsisimavoq, ilaatigut allaffissornerup annertusiartorneranik.

- Assersuutigalugu sanaartornermik immikkut ilisimasalli akuersissutini pigiinnarniarlugu ukiumut illussanik aalajangersimasunik arlalinnik suliniutinik suliaqartariaqarpoq. Aamma sanaartugassaq qanoq pisariutiginersoq apeqqutaalluni akuersissutit assigiinngiiaarput. Nunami killilimmik sanaartorfiusumi, soorlu Kalaallit Nunaanni, attatiinnarnissaa ajornakusoorsinnaavoq, tassani sanaartornermik ilisimasalik ukiut qulikkaarlugit inissiamik aqqaneq-marlunnik quleriinnik initalimmik sanaartorsinnaasarmat.

- Taamaattumik akuersissutit taakkua attatiinnarnissaat unammillernartorujussuusinnaavoq – tamannalu nunani allaniit suliffeqarfiit, nunanit allaneersunit sulisullit, ulluinnarni unammillertigeriikkatsinnut siunnersuinermit suliakkiissutit tunniunneqartalernissaannik kinguneqarsinnaavoq.

- Kalaallit Nunaannut niuernerlunneruvoq. Kalaallit Nunaanni sanaartornermut malittarisassat nunatsinni inuiaqatigiinnut tulluartunngorlugit naleqqussarluartariaqarput, piujuartitsineq eqqarsaatigalugu – nukissiornermut piumasaqaatinut, atortussanik toqqaanermut il.il. tunngatillugu kisimi pinnani aammali Kalaallit Nunaanni siunnersuisartunut, Ujarak Rosing Petersen nassuiaavoq.