Sanaartugassanik suliaqartartut angisuut naatsorsuutinik amigartoorujussuartunik tunniussaqarput – Kalaallit Nunaanni annaasaqarneq pissutaatinneqarpoq
MT Højgaard 2023-mi qaammatini qulingiliuani siullerni nunani tamalaani suliani amigartooruteqarujussuarpoq. Tamanna pingaartumik Kalaallit Nunaanni annertuunik sanaartornerni pingasuni annaasaqartoqarneranik pissuteqarpoq. Nunatsinni ingerlatseqatigiiffiit tuniniarneqassapput aamma Danmarkimiillu sukangasumik maanna aqunneqalerput.
Suliffeqarfissuaq sanaartugassanik suliaqartartoq MT Højgaard Holding isertitatigut Danmarkimi ingerlalluartorujussuuvoq, kisianni nunap avataani ingerlanerluppoq.
Aviisi Sermitsiaq taama allappoq.
2023-mi qaammatini qulingiluani siullerni ingerlatseqatigiiffiup nunani tamalaani niuerfia MT Højgaard International, ingerlatsinermi 185 millionit koruuninik amigartooruteqarpoq. Annaasaqarnerit pingaartumik kalaallit sanaartornikkut suliniutaannik pingasunik pissuteqarput. Nuummi mittarfissuup illutaanik sanaartornermut kiisalu Nuummi aamma Qaqortumi aappaagu piareerneqartussanik kollegialiortiternernut tunngapput.
Danmarkimi sanaartugassanik suliaqartartut suliffeqarfissuit annersaata tulliata naatsorsuutaani tamanna atuarneqarsinnaavoq. MT Højgaard Holding pappialanik nalilinnik niuffaffimmi nalunaarsorneqarsimasup oktobarip naanerani nunani tamalaani suliat tuniniassallugit aalajangerpoq, tassani MT Højgaard Kalaallit Nunaat aamma Arssarnerit ilanngullugit. MT Højgaardip 2023-mi qaammatini arfinilinni siullerni nunani tamalaani suliamini ingerlatsinermi 83 millionit koruuninik amigartoornera eqqarsaatigalugu, annaasaqarnerit piffissami juulimi, aggustimi aamma septembarimi assut ajorseriarput. Maanna qaammatinut qulingiluanut naatsorsuutit tamanna takutippaat.
Aqutsineq tigugaat
MT Højgaard Danmarkip pisortaanerata Carsten Lundip aamma aningaasaqarnermut pisortaata Søren Wulffip suliat aqunneqarnerat aamma Kalaallit Nunaanni ingerlatseqatigiiffinnut marlunnut aqutsisutut akisussaaffik maanna tigusimalerpaat.
Aviisimi Sermitsiami atuarnerusinnaavutit. Aviisi uani pissarsiarisinnaavat:
