Saqqummersitsinissarsuarmut piareertut
Ilulissat Nunatsinni aalisarnermut piniarnermullu atortunik oktobarimi saqqummersitsiviunissaanut atatillugu Avannaata Kommunia angisuunik anguniagaqarpoq.
Nunatsinni aalisarnermut atortunik saqqummersitsisarneq Polar Fish, ukioq allortarlugu Sisimiuni ingerlanneqartaraluartoq, Ilulissani pisussanngorlugu 2019-imi aalajangiunneqarmalli, ilungersunartorsiorfiusimavoq.
Aviisi Sermitsiaq taama allappoq.
Corona patsisigalugu saqqummersitsinissaq arlaleriarluni taamaatiinnarneqartarpoq, 2022-mili iluatsinnissaa Avannaata Kommuniata qularutiginngilaa, taamaalilluni piareersarnerit ukiarmili aallarnisarneqalereerput. Tamannalu pilluni Danfiship – Polar Fishitulli ingerlanneqartartup, Aalborg Kongres og Kulturcenterimi oktobarimi ingerlanneqarneranut atatillugu.
Avannaata Kommunia inuussutissarsiornermut siunnersortinik sisamanik aamma inuussutissarsiornermut qullersaq Bendt K. Kristiansen peqatigalugu saqqummersitsivimmi saaffigineqarsinnaasumiipput, tamatumani ussassaarutigineqarluni Polar Expo Fish and Hunting 2022, Ilulissani oktobarip 11-annit 13-iannut ingerlanneqartussaq.
Aalborgimi ammaanersiortoqarnerani Avannaata Kommuniani borgmesteri Palle Jerimiassen, allamut tunngatillugu aamma Danmarkimiittoq, aamma peqataavoq.
Saqqummersitsinissaq taamaatiinnarneqartoq
– Ilikkagaqarniarluta maaniippugut. Tassami aalisarnermut piniarnermullu atortunik saqqummersitsinissaq siorna pilersaarutaagaluartoq coronap kinguneranik taamaatiinnarneqarami. Taamaalillutalu periarfissaqaleratta saqqummersitsineq angisooq qanoq ingerlanneqartarnersoq annerusumik paasisaqarfigissallugu, Palle Jerimiassen Sermitsiamut oqarpoq.
– Suliffeqarfiit peqataaniarlutik siorna nalunaarsimagaluartut naatsorsuutigaarput Polar Expomut ukioq manna pisussamut takkukkumaartut, aammali Danfishimut peqataanerput atorlugu amerlanerusut peqataanissaminnut nalunaarnissaat neriuutigaarput.
Aviisimi Sermitsiami atuarnerusinnaavutit. Aviisi uani pissarsiariuk: