SAS Norwegianilu Air Greenlandimut unammillernissaminnut piukkunnarsartut
SAS-ip Savalimmiunut Islandimullu timmisartuussisarnini annertusiartortippai, timmisartortitseqatigiiffiullu Air Greenland Atlantikoq qulaallugu timmisartuussisarnerani unammillernissaa isumaliutigaa, tassa Nunatsinni mittarfiit nutaat 2023-mi atorneqalerpata. Norwegian aamma taamaaliorpoq
Air Greenlandip Atlantikoq qulaallugu timmisartuussisarnermini ukiut arlaqanngitsut qaangiuppata nunat allamiut timmisartuutileqatigiiffiannit ataatsimit arlalinnilluunniit sakkortuumik unammillerneqarnissani ilimagisinnaassavaa.
Ilaatigut Skandinaviami timmisartuutileqatigiit annerpaat marluk SAS-ip aamma Norwegianip Kalaallit Nunaanni timmisartuussisalersinnaanissamut periarfissat isiginiarpaat aamma Europap Kalaallit Nunaatalu akornanni angallassisalernissartik isumaliutigalugit, Sermitsiaq allappoq.
Timmisartuutileqatigiit taakku Air Greenlandimut unammillerniarlutik aalajangissappata, Air Greenlandip Nunatsinnut angallassisarnermini billetinut akigititai, amerlaqisunit akisuallaartutut isumaqarfigineqartut pillugit unammilleqatigiittoqalissasoq Sermitsiap maluginiarpaa taamalu kalaallit timmisartuutileqatigiiffiata aningaasarsiornera tatineqassaaq.
- Kalaallit Nunaat alaatsinaapparput, naak taavunga angallassisalernissamik aalajangersimasumik pilersaaruteqanngikkaluarluta. Isertuutissanngilarali Kalaallit Nunaannut timmisartuussisinnaalernissaq takusinnaagatsigu, tassa mittarfissualiarineqartussat piareersimaleriarpata. Kalaallit Nunaannummi takornariarnissaq soqutigineqaleraluttuinnarmat, Norwegianimi attaveqaqatigiinnermut pisortaq Andreas Hjørnholm Sermitsiamut oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiariuk: