Savaaqqat amerlanerit toqorarneqarput - oqinneruppulli
Savaaqqanik toqoraaneq ukioq manna naammassivoq. Siornamut sanilliullugu savaaqqat toqorarneqartut amerlanerulaarput, neqili pissarsiarineqartut siornatulli annertutigiinnarpoq. Savaaqqammi oqilisimapput. Neqi A/S taama paasissutissiivoq.
Savaaqqanik toqoraanik annerusumik kinguaattoorfiunngitsoq naammasseqqammerpoq. Neqi A/S taama nalunaaruteqarpoq.
Neqi A/S-imi pisortaq, Ole Vestergaard, ilisimatitsivoq savaaqqat siornarnit amerlanerusut toqorarneqarsimagaluartut, taamaattoq neqi pissarsiarineqartoq siornatulli annertutigiinnartoq. Savaaqqat agguaqatigiissillugu oqimaassusaat siornarnit annikinneruvoq.
Savaaqqat agguaqatigiissillugu 1,3 kilomik oqilisimapput, tassa 2021-mut sanilliullugu 8 procentimik oqinnerullutik.
- Agguaqatigiisillugu oqimaassusaat taama appasitsiginera nunatta kujataani savaatilinni tamani nalinginnaasumik atuuppoq, taamaattoqarneralu siallerujussuaqattaarnerani panerujussuaqattaarneranillu pissuteqarsoraarput. Neqip pitsaassusaata nalilersortarneranut uuttuutigisartakkavut (orsoqassuseq nukiillu) eqqarsaatigalugit taakku allannguuteqanngillat, pisortaq ilisimatitisivoq.
Savaaqqat siunissaat nalorninartoq
Savaaqqat 20.275-it toqorarneqarsimapput, savallu 1.962 ukioq manna aamma toqorarneqarsimallutik. Siorna savaaqqat 18.705 aamma savat 1.403 toqorarneqarput.
Savaatillit aningaasaqarniarnikkut ikiorsiivigineqarsimagaluarlutik, suli ilungersunartumik inissisimapput.
Taamaammat toqorarneqartut amerlanerugaluartut, ineriartornerup pitsaaneruneranik takussutissiinngilaq:
- Ukioq manna savat toqorarneqartut amerlanerunerat imaaliinnarlugu pitsaasutut taaneqarsinnaanngilaq, tassami savaatillit ilaat matoorarput nerukkaatissallu akitsoriartuinnarmata savaatillit ilaasa savat ukiukkut katersortarunnaariartorpaat. Taamaattumik aappaagu savaaqqanik piaqqiortitsinissamut tamanna sunniuteqarsinnaavoq, KNI A/S allappoq.
Nersussuit anginerullutillu amerlanerulersut
Nersussuit ukiup aappassaanik oqimaaleriarsimallutillu amerleriarsimasut, Neqi A/S-ip maluginiarpaa.
Kujataani tuttuuteqartut ikileriarsimapput, tuttummi ukiorlunnerani nerisaqartinniarnerat ajornakusoornerulersimavoq.
Neqi A/S ikiorsiissuteqartoqaraluartoq, akit qaffalaassallugit aalajangersimavoq.
- Nerukkaatissanut naggorissaatissanullu pisiortornermut Namminersorlutik Oqartussat tapiissuteqarnerat iluaqutsiullugu akit taamaallaat 1-2 %-imik qaffariaateqartissavavut, Ole Vestergaard naggasiivoq.
