Savalimmiormiut rekordileeqqittut
Savalimmiuni sulisinnaasut Europami suliumatunersaapput. Inuusuttullu suli ukiukillutik sulilertarput.
Savalimmiormiut Europami inuianni suliumatunersaapput. Innuttaasut sulisinnaasut suleriaannaat pineqartillugit, Savalimmiormiut Europami nunanut allanut sanilliullutik rekordileeqqipput.
Aviisi Sermitsiaq taama allappoq.
Savalimmiormiut innuttaasut 84,9 procentii sulisinnaassuseqarput. Savalimmiuni naatsorsueqqissaartarfiup, Havstova Føroyap, sulisinnaasunik misissuinerata nutaap tamanna paasinarsisippaa. Tamatumani tunngavigineqarluni kisitsisit nalunaarsukkallu Eurostatimeersut.
2022-mut ukiumoortumik misissuinermi tamanut saqqummiunneqaqqammersumi Savalimmiuni sulisinnaassusillit 15-it 74-illu akornanni ukiullit, Europami nunanut allanut 35-nut sanilliunneqarput, Tyrkia ilanngullugu.
Sulisinnaassusillit kisitsisaata takutippaa, innuttaasut qanoq amerlatigisut sulisinnaassuseqartunut ukiulinnut ilaanersut, sulisartoqarnermi piareersimasutut inissisimasut.
Savalimmiut arnanut angutinullu atatillugu sulisinnaassusilinnik amerlanerpaanik inuttaqarpoq, soorlumi ukiorpassuarni taama inissisimasut. Savalimmiulli nunanut allanut sanilliullutik ukiuni kingullerni siuariaateqarnerusimapput. Siornatigummi siullertut inissisimanissaq Savalimmiut Islandillu unammissutigisaraluarpaat.
Savalimmiuni suliffissaaleqisut 1 procent ataatingaatsiarlugu amerlassuseqarput.
Aviisimi Sermitsiami atuarnerusinnaavutit. Aviisi uani pissarsiariuk:
