Savalimmiuni naalakkersuisut ikinnerussuteqalersinnaapput

Savalimmiuni aalisarnermut naalakkersuisup aalisagartassiissutit akitsorterullugit tuniniartalernissaannik siunnersuutaa itigartinneqaratarsinnaavoq.

Naalakkersuisut siulittaasuata partiiani (Javnadarflokkorin (Socialdemokraterne) ilaasortat marluk aalisarnermut ministerip, Tjódveldip (Republikanerne) siulittaasuata Høgni Hoydalip, siunnersuutaa qularnartoqartippaat.

Killeqanngitsumik

Savalimmiuni naalakkersuisut, partiinit Javnadarflokkorin-imit, Tjódveldimit Framsóknimillu katitigaasut, ukiarmi naalakkersuisut pilersinneqarneranni isumaqatigiissutigaat alisagartassat politikkikkut agguaattarunnaarlugit killeqanngitsumik aalisarneqartalissasut.

Akerlerineqaqisoq

Maanna aalisarnermut ministerip Høgni Hoydalip siunnersuutigaa Barentshavetimi pisassat ilaat 2016-imi akitsorterullugit tuniniarneqassasut. Tamanna aalisartunit akerlerineqartorujussuuvoq, tamatumani tusarniaavigineqartut tamarmik aaqqissuussineq qularnartoqartillugu.

Naalakkersuisooqatigiit iluanni socialdemokratit sinnerlugit inatsisartunut ilaasortat, Kristin Michelsenip Bjarni Hammerillu, Suduroymi borgmesterip borgmesterillu tulliata, siunnersuut ernumanartoqartippaat.

– Høgni Hoydal siunnersorusuppara siunnersuutip ilaa, akitsorterussinermut tunngasoq, tunuarteqqullugu, siunnersuut decembarip 17-ianni Lagtingimi oqaluuserineqarmat Kristin Michelsen oqarpoq.

Bjarni Hammer savalimmiut tv-annut oqarnikuuvoq aningaasat aalisartunit - tassa umiarsuaatileqatigiinnit - tiguneqarnissaat akerleralugu.

Pisassat ilaminiinnanngui

Høgni Hoydalip siunnersuutigaa Barentshavetimi pisassanit avaleraasartuut 10.000 tonsit, ammassassuit 5.000 tonsit, saarulliusaat 25.000 tonsit aammalu aalisakkat immap naqqarmiut 3.000 tonsit akitsorterullugit tuniniarneqassasut. Tamakkua pisassat tamarmiusut ilaminiinnannguaraat.

Siunnersuummut oqaaseqaatini allassimavoq akitsorterussinissami siunertaasoq, aaqqissuussineq tamanna aalisagartassat agguaanneqarneranni atortutut qanoq atorneqarsinnaanersoq takuniarlugu.

Aaqqissuussineq 2018-imiit

Savalimmiuni aalisarnerup aaqqissuuteqqinneqarnissaa ukiuni arlalinni sammineqarsimavoq isumaqatigiissuteqartoqarani. 2018-imi januaarip aallaqqaataanit aalisarnermut pisinnaatitaaffiit tamarmik naalakkersuisunut utertinneqassapput, taamaattumik politikerit tamanna nallertinnagu pisassat qanoq agguaanneqartarnissaannik aaqqiissutissamik nassaarniassapput.

Høgni Hoydal suleqatigiissitaliorpoq aalisarnermut aaqqissuusseqqinnermik nutaamik suliaqartussamik.

Kristin Michelsen oqarpoq paasisinnaanagu aalisarnermut pisinnaatitaaffiit akitsorterunneqarnissaannik aalajangiineq sooq utaqqissunneqarsinnaannginnersoq, suleqatigiissitap suliaminik naammassinnereernissaanut.

Akerlineqaqisoq

Fæøernes Rederiforening tusarniaanermi akissummini oqarpoq, ersissutigalugu akitsorterussinissamik siunnersuut akitsorterussisalernissat pilersaarutip annertunnerusup ilagigaa, aalisarnermik aalajangersimasumik ingerlatsinerup ilaatut.

Umiarsuaatileqtigiit peqatigiiffiata akitsorterussisalernissat akerlerai, ilaatigut pissutigalugu umiarsuaatileqatigiit akornanni aalisakkanik unammineq ima sakkortutigilissammat, tamatuma kingunerisinnaallugu aalisarnerup akilersinnaajunnaarnissaa.

– Landskarsip aallaqqaammut naatsorsuutigisinnaavaa pisassanik tunisinikkut isertitaqarluartassalluni, piffissalli ingerlanerani aalisarnermik ingerlatsisut aalisakkanik unammisut ikinnerulissapput. Taava landskarsip isertitai ikinnerulissapput, umiarsuaatileqatigiit peqatigiiffiat tusarniaanermi akissummini oqarpoq.

Inernissaa ilisimanngilaat

Siunnersuut siullermeerneqareersoq inuussutissarsiornermut ataatsimiititaliami oqaluuserineqarpoq, tassanilu Bjarni Hammer siulittaasuuvoq.

Bjarni Hammerip Kristin Michelsenillu oqaatigiumanngilaat qanoq taasisimanerlutik.

Aalisarsinnaanermut pisinnaatitaaffiit akitsorterunneqartalernissaata saniatigut siunnersuummi aamma ilaapput pisat aammalu tunisineq akitsuuserneqartassasut, kiisalu aalisakkat, umiarsuaatileqatigiit nunanut allanut tunisaat akitsuuserneqartalissasut.

Siunnersuut amerlanerusunit taperserneqassappat lagtingimut ilaasortanit 33-nit ikinnerpaamik 17-it isumaqataallutik taasissapput. Naalakkersuisut 16-inik ilaasortaatitaqarput. Lagtingimi ilaasortat marluk attaviitsuupput.

Aappaata Sonja Jógvansdottirip naalakkersuisut tapersersorpai.