Savalimmiunik aalisarnermik isumaqatigiissut inissippoq
Nunatta savalimmiut imartaani aalisarnissaa savalimmiullu nunatta imartaani aalisarnissaa Kalaallit Nunaata Savalimmiullu isumaqatigiissutigaat
Kalaallit Nunaata Savalimmiullu isumaqatigiissutigaat 2012-imi nunat taakkua marluk imartaanni aalisartutik qanoq amerlatigisunik aalisarsinnaanersut.
Nunatsinnit isumaqatigiissut nalilerneqarpoq "naammaginartutut".
Taamatut paasissutissiivoq Aalisarnermut, Piniarnermut Nunalerinermullu Naalakkersuisoqarfik, taassumalu aappaagumut nunat marluk imartaanni aalisarsinnaanermut pisinnaatitaaffiit Københavnimi isumaqatigiissuteqarfigisimavai.
-2012-imut isumaqatigiissutip kingunerisaanik Nunatta ammassassuartassai ikileriarput. Sumiiffimmi aalajangersimasumi saarullernartassat 2012-imi attatiinnarneqarput, savalimmiut imartaani 2.000 tonsit aalisarneqarsinnaallutik. Nunatta savalimmiut imartaani aalisakkanik immap naqqarmiunik ulluni 60-ini aalisarsinnaanini attatiinnarpaa, tusagassiorfinnut nalunaarummi allassimavoq.
Savalimmiut nunatta imartaani aalisarsinnaanera 2011-imut sanilliullugu allanngortinneqanngilaq.
- Isumaqatigiinniarnerit aallartinneranni nunatta ammassassuartassaata ikileriangaatsiarnissaat ilimanaraluarpoq. Sivisuumik isumaqatigiinniarnerit kingorna pisassat ilimagisamit amerlanerusut Aalisarnermut, Piniarnermut Nunalerinermullu Naalakkersuisoqarfiup pissarsiarai.
- 2012-imi nunatta ammassassuartassai 2.350 tonsiupput, ukioq manna 3.000 tonsiusimallutik. Pisassat ikilisinnerannut ilaatigut pissutaavoq TAC-p ikileriarsimanera, ilaatigullu ammassassuit akiisa ineriartornerat, taamatut nassuiaasoqarpoq.
Ukioq manna isumaqatigiinniarnerni aalisarnermik ingerlatsisut peqataaqqipput. Nunatsinni umiarsuaatileqatigiit inuussutissarsiortullu sinniisuisa, isumaqatigiinniarnerni peqataasut, Aalisarnermut, Piniarnermut Nunalerinermullu Naalakkersuisoqarfik peqatigalugu aappaagumut aalisarnissamut isumaqatigiinniarnerit inernerat nalilerpaat »naammaginartutut«.