Savat toqorarneqarnissaminnut ullut arlallit utaqqisarput: Neqi A/S-imi ajornartorsiutit savaatilinnut eqquipput

Kujataani savaateqartut 35-t missaanniittut aasami savaatiminnut narsaatinit nerisassanik katersuisarput, septembarimi oktobarimilu savat qaqqanit ammukartinneqannginnerini. Taava savat toqorarneqartarput, ukiumullu ataasiarlutik savaatillit savaatiminnik aningaasarsiortarlutik.

Savalli Narsami Neqi A/S-ip toqoraavianut nassiunneqartut ilaannikkut ulluni tallimani utaqqisarput. Savaatillit Sermitsiamut taama oqaluttuarput.

Savat ulluni taakkunani sanigortarput, tamannalu savaatilinnut isertitakinnerunermik kinguneqartarluni.

- Kaattarnerat uagut iliuuseqarfigisinnaanngilarput, Tasiusami aappariit savaatillit Aviâja Lennert aamma Klaus Frederiksen oqarput.

- Narsaq milliartuinnarpoq, tamannalu inuussutissarsiutitsinnut sunniuteqarpoq. Neqip toqoraavissuani pisut sulisussaaleqinerullu annertusiartornerata kinguneri malugisinnaavavut, tamanna savaateqarnitsinnut sunniuteqarpoq. Aalaakkaasunik sulisunik amigaateqartoqarpoq, Klaus Frederiksen, kinguaariit pingajuattut savaateqartartoq oqarpoq.

Taamaattoqassanngitsoq

Savaatillit Peqatigiiffiit Suleqatigiissuni (SPS) siulittaasup Suulut Hansenip savaatillit oqaluttuaat taperserpai. Savanik toqoraaffimmut utaqqisoqartarnera sulisussaaleqinermik toqoraavimmilu atortunik ajornartorsiuteqarnermit pissuteqartartoq oqarpoq.

- Toqorarneqarnissartik utaqqisaraat paasiuminaatsittorujussuuara.

- Taamaattoqaannarsinnaanngilaq ajoraluartumilli taamaattoqarluni. Peqatigiiffittut taama pisoqaraangat sukkanerusumik iliuuseqartariaqarpugut, Suulut Hansen oqarpoq.

SPS-imi ilaasortat arlallit Neqi A/S-ip saavani katersuullutik toqoraaviup ajornartorsiutaa pillugu siorna naammagittaalliorsimasut siulittaasoq oqaluttuarpoq.

- Siorna toqoraaneq siulleq ingerlalluarpallaanngilaq, kingullerlu pitsaanerumaarpoq inuppassuit toqoraavimmut naammagittaalliornikuummata, Suulut Hansen oqarpoq. Taanna 2011-miit 2017-imut siulersuisuni ilaasortaasimavoq, SPS-imili siorna siulittaasutut qinigaanissi tikillugu.

- Peqatigiiffimmut taamani ilaasortanngoqqaarama Neqip ullormut savat 900-t missaat ajornartorsiuteqarani toqorarsinnaasarpai. Siorna aamma taamaliorsimasinnaasut naatsorsuutigigaluarpara, kisianni ullormut 600-700-t missaannaat toqorarsinnaasimavaat, siulittaasoq oqarpoq.

Neqi A/S naapertorlugu nunap immikkoortuani savaatillit ukiumut 20.000-it missaanni savaaqqanik, tassa 350 tonsinik savaaqqap neqaanik, tunisassiortarput.

Pingaarutilik

Aviâja Lennert savaateqarnerup saniatigut Qassiarsummi atuarfimmi ilinniartitsisuuvoq, namminersortumillu takornarialerinermik ingerlatsilluni, tassanilu savaateqarfinni unnuisarfinnik neqerooruteqartarluni.

- Takornariat Nuuk aqqusaarlugu angalanatik Kujataanut toqqaannartumik angalarusupput, silallu kinguaattoorutaasarnera ajornartorsiutaajuaannarpoq. Taamaattumik eqqarsarpunga Narsarsuaq matuppat taamaatitsiinnarnerpassuarnik kinguneqarsinnaasoq, takornariat immaqa maanga tikissinnaannginnamik, Aviâja Lennert oqarpoq.

Aappariillu savaatillit takornariartitsisarneq pingaarnertut inuussutissarsiutiginngikkaluarlugu takornariat ikileriassappata sunniuteqassaaq.

- Mittarfiup matunera soorunami aningaasaqarnitsinnut sunniuteqassaaq, aningaasammi Neqi A/S-imi annaasagut matussusertaraluarmassuk, Aviâja Lennert oqarpoq.

Naammaginanngitsoq

Ilumoorpoq siorna ilimaginngisanik unammilligassaqarsimammat, tamatumalu kingunerisaanik savat savaaqqallu ilaat nalinginnaasumit sivisunerusumik toqoraavimmi uninngatinneqartariaqarsimapput.

Neqi A/S-imi pisortaq Ole Vestergaard Sermitsiamut oqarpoq. Taassuma nassuiarpaa toqoraaviup sapaatip-akunnerini siullerni unammilligassanik marlunnik eqqugaasimasoq: Narsami sulisut nualluummik coronamillu tunillatsissimallutik napparsimalernerat kiisalu toqoraavimmi maskiinat ilaata aserornera.

- Tamanna savaaqqat savallu ilaat sivisuallaamik savaaqqanut toqorarneqartussanut inissiivimmiittariaqarnerannik kinguneqarpoq. Tamanna naammaginanngitsoq nassuerutigaara, pilersaarusiorluarnerusimasariaqaraluarpugut, Ole Vestergaard oqarpoq.

Neqip toqoraavianut savat utaqqisut imissaqarluartinneqarlutillu nerisassaqartinneqartartut oqaatigaa. Savaaqqat ulluni sisamani amerlanerusuniluunniit imermik nerisassanillu pilersorneqarsimasut savaaqqanit ullut siulliit marluk ingerlaneranni toqutaasunit 400-500 grammit missaannik oqinnerusartut, pisortaq ilisimatitsivoq.

Ukiup tullianut pilersaarusiorneq

Savaaqqat 83 procentii ullut siulliit marluk ingerlaneranni toqunneqarput, 14 procentit ullut pingajuanni, 2 procentiinnaallu ullut sisamaanni tallimaanniluunniit. Savat affaat sinnerlugit ullut siulliit marluk ingerlaneranni toqunneqarput, ilaat ullut pingajuanni sinnerilu kingusinnerusukkut.

- Savaatillit peqatigiiffiata piumasaqaataa tunngavigalugu siorna toqoraaffik pilersaarutaasumiit sapaatip-akunneranik kingusinaartumik aallartipparput. Savaaqqat alliartornerlummata savaaqqat minnerunerannik kinguneqartoq peqatigiiffiup nalilermagu, taamaattumillu savaaqqat sapaatip-akunneranik ataatsimik alliartornissaannut periarfissikkusullugit, Ole Vestergaard oqarpoq.

Neqimi pisortaq naapertorlugu tamanna pissutigalugu ukioq toqoraaffiusq kingusinnerusukkut naammassineqarpoq. Neqip toqoraanissaq tulleq pilersaarusiulereerpaa. SPS peqatigalugu tamanna siusinnerusukkut pissasoq aalajangerneqarpoq.

- Sulisut amerlanerulaarnissaat sulissutigaarput, ingammik suliassani pingaarutilinni, unammilligassat ilimaginngisat iliuuseqarfigisinnaajumallugit. Teknikkikkut immikkoortortaqarfitta atortuvut tamaasa pitsanngorsarlugillu misilittarpai, siunissami assingusunik pisoqarnissaa pinngitsoortinniarlugu, Ole Vestergaard oqarpoq.