Savissivimmi ukiorlunnerata puisinniarneq ajornarsisikkaa
Piniartut ukiorlunnerani siku maniilattoq piniariarfiillu ilaanni puiseqanngivissortoq misigaat.
Savissivimmi piniartorsuup Qaerngaaq Nielsenip appaliarsuit upernaaq manna takkusimaarnerat iluarusuutigaa, tassami ukiorlussimanera suli malugeqigamiuk. Ukiuummat siku maniilattorsuusimavoq angallavigiuminaallunilu. Oktoberimi novemberimilu silap unerisimannginneranit sikuniaamaataarsimaqaluni.
Aviisi Sermitsiaq taama allappoq.
- Siornali ukiorluttaqattaaratta, qangamut sanilliullugu, piniarnerup tungaatigut Savissivik kinguariarujussuarpoq puisit eqqarsaatigalugu. Puisit amia kisiat inuussutissarsiutigigatsigut aningaasarsiutigigatsigut. Sila mumittaqattaarami, sikuanipiloorujussuarami, taava aamma imarorniapiloorujussuarami aamma. Taava puisit tammaramik puisaarulluni, qaattaqanngilaq. ataasiakkaannguit eqqaassanngikkaanni, Qaerngaaq Nielsen oqarpoq.
Savissivimmi piniartut puisit amii kisiisa tunillugit aniingaasarsiutigisinnaasatuarivaat, Great Greenland piniartunit amernik tigooraasumik sulisoqartarput, paasissutissaniillu erserpoq natsit amii tigoorarneqartartut.
Qaerngaaq Nielsen puisip amia isertitsissutigisaramiuk pisariaqartittaqaa, puisillu neqaa qimminut nerukkaatigisarlugu.
- Maannamut sunniuteqapiluppoq, puiseqanngilagut aasaraluarmallunniit. Aatsaat taamaatillugu takuara. Silap qanorinnera peqqutaalluni piniartuulluni piniarfigiuminaalluni, pisassat ajornakusoornerusaramik, tassalu januarip aallaqqaataaniit upernarneranut puiseqanngivikkami, Qaerngaaq Nielsen oqarpoq nassuiaallunilu Upernaviup avannaani Kullorsuarmilu puiseqarluarsimasoq, ukiorlunneralu peqqutigalugu puisit avammukarsimassasut piniariartarfinniit tammartuusillutik. Qaleraleqarluarporli.
Aviisimi Sermitsiami atuarnerusinnaavutit. Aviisi uani pissarsiariuk:
