Sermitsiap AG-llu suleqatigiinneq aallartisarpaat

Nunatsinni aviisit marluk nunarput tamakkerlugu saqqummertuaannarnissaat qulakkeerumallugu teknikkikkut aningaasatigullu sule¬qa¬tigiilernissap anguniarnissaanik nalunaarut aviisit marluk taakkua siulersuisuisa akuersissutigeqqammerpaat.

Aviisit siulersuisuisa arlariiusut siulittaasui – pisortaq Rita Jensen, Sermitsiaq, aamma pisortaq Ole Kilemann Hansen, Atuagagdliutit – ataatsimoorullugu oqaaseqaateqarput suleqatigiinneq taamaallaat pingaarnerusutigut siumut pilersaarusiornermut, teknikimut aningaasarsiornermullu tunngatillugu isumalioqqutigineqartunut, nunatsinni tusagassiuuteqarnikkut unammilleqatigiinnerup sakkortusineranit Internettip nassatarisaanit pilersinneqartumut, tunngasuusoq.

Siulittaasut sakkortuumik erseqqissarumavaat imaanngimmat aviisit marluk taakkua kattutsinneqartut. Akerlianik aviisit namminerisaminnik siulersuisoqartuassapput akisussaasutullu aaqqissuisoqartuassallutik isummertarnermikkut aviisillu aaqqissornerisigut ataatsimoorullugu ingerlatseqatigiiffimmut qilersorsimanngitsunik.

- Pineqartoq tassaaginnarpoq allaffissornikkut teknikikkullu inerlatsinermi naammassinnissinnaanerup allisarnissaa, tamannalu peqatigalugu avammut tuniniaanerup nakussassarnissaa piseqqusaarutillu kalaallinit pigineqartuaannarnissaata qulakkeernissaa, tassami nunarsuarmioqatigiinermi tusagassiuutit internetikkoortut piseqqusaarusiorneq, tusagassiuutit naqisimaneqanngitsut suugaluartulluunniit ingerlaannarsinnaajumallutik isumalluutigisaat, pillugu pilerngusaanneq allisikkaluttuinnarmassuk, Rita Jensen Ole Kielmann Hansenilu oqarput.

Tusagassiuutitigut ingerlatseqatigiiffik

Tusagassiuutitigut ataatsimoorullugu ingerlatseqatigiiffissap, aviisit nunatsinnut tamarmut siammartartut naalakkersuinikkut arlaannaannulluunniit qilersorsimanngitsut marluk saqqummertuaannarnissaannik qulakkeerisussap, piler¬sinniarnissaanik anguniagaqarnissamik nalunaarut aviisit siulersuisuisa atsioqqammerpaat.

Taama anguniagaqarnissamik nalunaaruteqarnikkut siunniunneqartoq tassaavoq tusagassiuuteqarnikkut periaaseq ilaatigut Fynimi ilisimaneqartoq, tassani aviisit Fyns Amts Avisip aamma Fyns Stiftstidendep aktiaateqarnikkut ingerlatseqatigiiffik Fynske Medier A/S pilersissimammassuk. Ingerlatseqatigiiffiup ataatsimoorullugu pigineqartup taassuma aviisit allaffissornikkut ingerlanneqarnerat, natsorsuuserinerat, teknikiat, tuniniaanerat takoqqusaarisarnerallu, atuakkanik naqite¬ri¬sitsisarnerat il.il. ingerlatarai, aviisilli tamarmik immikkut aaqqissuisoqarfeqaannarlutik, tusagassiornikkut ingerlatseqatigiiffimmut ataatsimoorussamut qilersorsimanatik.

Taama suleqatigiilerneq aviisit aaqqissuisoqarnikkut pitsaassusiata attatiinnarnissaanut iluaqutaassaaq – naak Namminersornerullutik Oqartussat nassiussuinermut tapiissuteqartarnertik annikilliartortikkaluaraat – tamannalu peqatigalugu nunatsinni tusagassiorfinnik naalakkersuinikkut arlaannaannulluunniit qilersorsimanngitsunik marlunnik, isummanik saqqummiussuinermikkut nunatsinni inuit oqartussaaqataatillugit naalakkersugaanerup ineriartortinneqarnerani annertusar¬neqarneranilu peqataasinnaasunik peqartuarnissaa qulakkiissallugu.

Nalunaarutigaat pingaarnerusutigut pilersaarusiornikkut suleqatigiinnissaq pillugu isumaqatigiinniarnissat ukiariartornerani ingerlallugit ataatsimoorussamik ingerlatseqatigiiffissap ukiut nikinneranni pilersinneqarnissaa anguniarneqartoq.