Sermitsiaq nutaamik aaqqissuisuunertaalersoq
Dorthe Olsen Sermitsiap aaqqissuisoqarfianeersoq, Poul Krarup nunami aviisit annersaanni aaqqisuisuunerusoq taarserlugu aaqqissuisuuninngussaaq.
Tusagassiortoq Dorthe Olsen ukiuni arlaqartuni aviisimi Sermitsiami sulisuuvoq. Tusagassiortutuinnaanngitsoq. Aaqqissuisuuneq Poul Krarup sulinngiffeqaraangat, Dorthe Olsenip Sermitsiaq aquttarpaa, aaqqissuisullu oqartarnerattut ”aviisi innartittarlugu”.
Sermitsiamili paarlattaasarnini maanna taamaatilerpaa.
Dorthe Olsenip nunami aviisit annersaata aqunneqarnera maajip aallaqqaataani tigussavaa.
Dorthe Olsen ukiuni 16-ini Sermitsiami sulisuuvoq. Tamatuma siornatigut KNR-imi radioaviisimi sulisimalluni. Aaqqissuisuuninngortussaq suliassaminut piareersimavoq.
- Tusagassiorfiup siulersuisuisa tatiginninnerat nuannaarutigilluinnarpara. Aviisip ilisimalluakkama aammali suleqatikka pikkorissut peqatigalugit ineriartortikkusulluinnangakkama siuttuuffiginissaanut qilanaarpunga.
Poul Krarup, aaqqissuisuunertut nammineerluni tunuarusussimasoq aviisimi tusagassiortutut ingerlaannassaaq. Taartissani imatut siunnersortarnianngilaa, ukiulli ingerlaneranni aaqqissuisutut siunnerfigisartakkani pillugit avitseqatigisarniarpaa.
- Aaqqissuisuunertut atuartartut tusarusuttagaat isumagineqaannartussaanngilaq. Aammali inuiaqatigiit ineriartornerannnut pingaarutilittut nammineq isumaqarfigisat atuartartullu ilisimasariaqagaattut nammineq pingaarutilittut isigisat tusarliunneqartussaapput.
Taarsiinissaq qangali pilersaarutaasoq
Christian Schultz-Lorentzen tusagassiorfimmi Sermitsiaq.AG-mi pisortaanerusoq naapertorlugu, aaqqissuisuunermik taarsinnissaq qangali suliarineqalersimasoq.
- Dorthe Olsen piukkunnarluinnartuuvoq, nuannaarutigaaralu suliassamut angersimammat. Aviisi naqqaniit ilisimasaqarfigiinnanngilaa. Kalaallit Nunaanni pissutsinik ilisimasaqarluartuuvoq, Sermitsiamillu aqutsillunilu ineriartortitsinissamut suliatigut inuttullu piginnaasaqarluartuulluni, Christian Schultz-Lorentzen, Poul Krarupimut Sermitsiami suliaqarsimaneranut qujassuteqartoq oqarpoq.
- Ukiut 30-t sinnerlugit aaqqissuisuunerusimavoq. Tamanna sutigut tamatigut kakkaginarluinnarpoq. Isornartorsiuinertalimmik tusagassiisarnissap attatiinnarneqarnissaa Kalaallillu Nunaanni naqisimaneqanngitsumik tusagassiisarnissap qulakkeerneqarnissaa tamaviaarluni sulissutigisarsimavai.