SF-imeersoq aatsitassarsiorneq pillugu: EU Kalaallit Nunaanni iluaqutaasinnaavoq

EU Kalaallit Nunaanni iluaqutaasinnaavoq, pingaartumik London Miningip nunap ataani pisuussutinik piiaanialeruttornerani.

Taamatut oqarpoq qallunaaq europaparlamentimut ilaasortaq Margrete Auken, SF, atuagassiaq sapaatip akunneranut saqqummersartoq Mandag Morgen allaaserinnereersorlu EU europamiut-kalaallit ingerlatseqatigiiffissuannik namminersortumik pilersitsiniarnissamik pilersaaruteqartoq.

- Uanga nammineq isumaqarpunga tamanna isumassarsiatsialaasoq, tamanna pissappat EU-p Kalaallit Nunaat inatsisitigut nakkutilliinermillu ikiorpagu. Tamakkua ingerlakkuminaatsorujussuummata.

Taassuma erseqqissarpaa EU-p akulerunnera pissasoq kalaallit piumasaat tunngavigalugit.

- Kalaallit Nunaat inukitsuararsuuvoq, taamaattumik unammilligassat angisuut ingerlakkuminaapput. EU-milli suleqateqarneq iluamik pissaaq, aammalu pissarsiniartoqaannassanngilaq, Margrete Auken oqarpoq.

Mandag Morgen naapertorlugu EU-Kommissionimi paasisaqarfiup paasissutissiissutigaa italiamiup suliffissuaqarnermut kommissærip Antonio Tajani-p sulisuisa pilersaarusioraat qanoq isilluni europami selskabit suliffissuaqarfiit siuttut kalaallit peqataatillugit ingerlatseqatigiiffissualiorsinnaanersut.

Ingerlatseqatigiiffissuaq taanna teknikkikkut immikkut ilisimasaqassaaq, angissuseqassalluni aningaasaqassallunilu Kalaallit Nunaanni aatsitassanik atortussiassanillu qaqutigoortunik piiaanissamut peqataaniassaguni.

Carlo Corazza-p, kommissær Tajani-p oqaaseqartartuata, Mandag Morgen-ip paasissutissiissutai oqaaseqarfigiumanngilai.

Taassuma erseqqissarpaa EU-Kommissioni aningaasaliisutut ingerlatsisinnaanngitsoq, tamannali peqatigalugu oqarluni Kalaallit Nunaanni aningaasarsiornikkut ingerlatsilernissami europamiut selskabiisa annertunerusumik peqataanissaat kommissærip sapinngisani tamaat sulissutiginiaraa.

Tajani-p tikeraarnera pillugu atuaruk "Peqatigiinneq pitsaasuussaaq"

Antonio Tajani 2012-imi aasakkut Nunatsinnut tikeraarpoq. Taamanikkut Naalakkersuisut siulittaasuallu Kuupik Kleistilu, Inuit Ataqatigiit, siunertamut nalunaarut atsiorpaat.

Tassuuna siullerpaamik qulakkeerneqassaaq aatsitassat piumaneqartut eqqarsaatigalugit nunani tamalaani niuernermi malittarisassat Kalaallit Nunaata malissagai.

Nalunaarut aamma alloriarneq siulliuvoq aatsitassarsiornermi EU-mik suleqatigiinnissamik isumaqatigiissuteqarnissamut.