SIK: Aningaasat nalikinnerulernerat akissarsiat qaffannerunissaannut unammillernissamik kinguneqassaaq
Aningaasat naleerukkiartornerat ukioq manna 3 procentit sinnerlugit ukiullu tulliani 5 procentit sinnerlugit nalikinnerulissasut, aningaasarsiornermik ilisimasallit ilimagaat. Tamanna SIK-p siulittaasuata ernummatigaa
Nunarsuarmi aningaasarsiornermut sunniutillit ilungersunarnersaat, ukiuni kingullerni pingasuni atuuttut, Nunatta anigorpai. Aviisi AG taama allaaserisaqarpoq.
Nunarput ingerlalluarpoq: Aningaasaqarnerup ineriartornera pitsaasoq nunat tamalaat akornanni aningaasaqarnermi pissutsit allanngorartorujussuugaluartut, ingerlaqqippoq, oqaluttuarisaanermilu suliffissaaleqisut aatsaat taama ikitsigaat.
Kisianni aningaasat naleerukkiartornerunerat malugineqarsinnaavoq, tamanna isumaqarpoq, akissarsiat nalikinnerulernerat, ulluinnarni nioqqutissat, ineqarnermut akiliutit, nukissiornikkut akit allallu akii qaffakkiartormata. Pisoq sulisartut kattuffiannit malinnaaffigilluarneqarpoq. Aningaasat naleerukkiartornerat ukioq manna 3,5 procentip missaanniittoq ukiup tulliani 5 procentit sinnerlugit qaffannissaa naatsorsuutigineqarput. Tamanna kattuffiup siulittaasuata Jess G. Berthelsenip ernummatigaa.
- Suliffeqarfinnut pisortat ingerlataannut Sulisitsisunullu, namminersortunut piumasaqaatit ingerlanniakkavut, aningaasat naleerukkiartornerisa qaffakkiartornerannut tunngassuteqarpoq. Ilaasortatta aningaasarsiaat massakkumut nalikillereernikuupput, sunut tamangajannut akinik qaffaasoqarnera pissutigalugu, aningaasallu naleerukkiartornerat ingerlaannassappat akissarsiat assingusumik nalikinnerulissapput. Isumaqatigiinniarnerit aallartikkutsigit akissarsiat pillugit ilungersunartumik isumaqatiginninniartoqassasoq Jess G. Berthelsenip AG-mut oqaatigaa.
Sapaatip-akunnerani matumani AG-mi saqqummertumi paasisaqarnerugit: Uani isissutissarsigit:
