SIK katersugaasivimmi sulisup soraarsitaanera pillugu: Suliamut akuliunniarpugut

Illuatungerisamut tusarniaariarluni soraarsitsillun. Pissutsit taamaatussaapput.

Sulialli sisamat pillugit illuatungerisamut tusarniaasoqarsimavoq, suliallu tallimaat pissutigalugu soraarsitsisoqarluni. Katersugaasivimmi sulisoq Mads Mitchell pillugu suliaq SIK-mit erseqqinnerusumik misissuiffigineqarniarpoq, Mads Mitchellip Ilulissat Katersugaasiviani qaammatini pingasuni akisussaaffeqarnermini Jim Lyngvildip saqqummersitsinissaa sulissutigisimavaa.

Illuatungeriit piffissami aalajangersimasumi sulisoqarnissaanik isumaqatigiissuteqarsimappata, sulisitsisoq piffissami aalajangersimasumi atorfeqartitsinerup kingorna atorfeqartitsinermi pissutsit nalilersoreerlugit atorfeqartitsinermik unitsitsisinnaavoq. Tamanna erseqqissaassutigissallugu pingaaruteqarpoq. Sulisitsisorli piffissami aalajangersimasumi atorfeqartitsinermi qanorluunniit iliorsinnaatitaanngilaq, SIK-p allattoqarfiani pisortaq Bjarne Petersen erseqqissaavoq.

Tunngavilersuutigisimasaq isumaqanngitsoq

Soraarsitsinissamut tunngavilersuutigineqarsimavoq: ”Piffissami aalajangersimasumi misiligummik atorfeqartitsineq ataatsimut nalilersoreerlugu kommuni aalajangersimavoq, atorfeqartinneqarnerit ingerlateqqinniarnagu, taamaalillutit ulloq 16. marts 2022 kingullermik suliffigissavat, misiligummik atorfeqartinneqarnerit naappat”.

Bjarne Petersen naapertorlugu soraarsitsisinnaaneq pisortat ingerlatsineranni suliassat suliarineqartarnerat pillugu inatsimmi aalajangersagaasoq, soraarsitsissagaannili sulisitsisoq soraarsitsinermut naammaginartumik tunngavilersuisussaavoq.

- Kommunimit piffissami aalajangersimasumi misiligummik atorfeqartitsinermi suleqatigiissimanerup ataatsimut nalilersuereerluni soraarsitsinissamut tunngavilersuutigineqarsimasoq naammaginaranilu isumaqanngilaq. Kommuni tigussaasunik tunngavilersuisimasariaqaraluarpoq – tassa sulisoq soraarsinneqarnerminut nalornissuteqartilerlugu isumaqanngitsumik tunngavilersuinani.

Taassuma aamma oqaatigaa, sulisumik soraarsitsinissamut tunngavilersuutigineqarsimasoq Mads Mitchellip pissarsiarisimasaa isumaqartitsilersinnaasoq kinaassusersiortumik soraarsitsisoqarsimasoq.

Mads Mitchell nammineerluni isumaqarpoq, Lyngvild pillugu suliaq soraarsitsinermut tunngaviusoq, kommunimili pisortap Nick Nielsenip tamanna taamaannginnerarpaa.

Bjarne Petersenip tupigusuutigisaa alla tassaavoq, kommunip soraarsitsinermini tusarniaasimaneq aamma tusarniaanermut akissutigineqarsimasut Mads Mitchellillu uppernarsaatitut tunniussimasai oqaaseqarfigisimanngikkai.

- Soraarsitsinermi allakkami sulisup tusarniaanermut oqaaserqarfigisimasai kommunip isummerfigissallugit pisussaavoq, suliamilu matumani tamanna pisimanngilaq.

Isornartorsiutigineqarsimasoq atorsinnaanngitsoq

Soraarsitsisimaneq aamma tusarniaanermi ilanngunneqarsimasunut sanilliullugu allarluinnarmik pissuteqarpoq.

Kommuni illuatungerisamiut tusarniaanermini sulisumut atatillugu isornartunik arlalinnik taasaqarsimavoq – sulisullu tusarniaanermut akissummini oqaaseqarfigisimasaanik. Kommunilli soraarsitsilluni allagaani tunngavilersuutit taakku ilanngunneqarsimanngimmata, isumaqarnarpoq tunngavilersuutigineqarsimasut atorsinnaanngitsut.

- Taamaammat soraarsitsineq kinaassusersiortuunersoq apeqquserneqarsinnaavoq – aamma sulisisitsisoq soraarsitsinissamut "nutaamik tunngavilersuilluni" sulisumut tusarniaaqqissinnaasimagarluarpoq, sulisoq isorineqartunut isummertillugu. Ilaatigut pissutsit tamakku pillugit SKI-mit kommuni saaffigineqarniarpoq, katersugaasivimmi sulisup soraarsinneqarnerani kinaassusersiortoqarsimannginnersoq misissoqqullugu.

SIK Mads Mitchellip qinnuiginninneratigut suliamut akuliunniarpoq, taamaammallu malittarisassat malillugit soraarsitsisoqarsimanersoq pillugu qulaajaasoqarnissaa siunertaralugu kommuni attaviginiarlugu.