SIK-mi isumaqatigiissutit inissipput
Namminersorlutik Oqartussat SIK-llu isumaqatiginninniartartuisa SIK-mi ilaasortat akissarsiaannut isumaqatiginninniarnerit 3. september naammassivaat. Akissarsianut tunngatillugu pitsanngoriaatit katillugit 128,2 milliuunit koruuninik naleqarput.
Namminersorlutik Oqartussat SIK-llu isumaqatiginninniartartui sulisartut akissarsiaannut tunngatillugu 3. september isumaqatigiipput. Isumaqatigiissutit sulisartunit taasissutigineqareerpata illuatungeriit atsioqatigeeriaannanngussapput. Namminersorlutik Oqartussat taama tusagassiorfinnut nalunaaruteqarput.
- Sivisusimaqaaq, angusaqarfiusumilli isumaqatigiinniarsimavugut. Pitsanngorsagassat isiginiarsimavagut - aningaasarsiaannaat pinngikkaluarlugit atorfininnermi atugassarititaasut pingaaruteqartut allat aamma angusaqarniarfigivagut, illuatungeriit tusagassiorfinnut nalunaaruteqarlutik oqaaseqarput.
Isumaqatiginninniarnerit ingerlanneqarnerata kipiluttunarnera pissutigalugu Sulisartut Inuussutissarsiuteqartut Kattuffiata, SIK-p, suliumajunnaarsitsinissaq periarfissatut siornatigut oqaluuserisimavaa. Suliumajunnaarnissarli pinngitsoortinneqarpoq illuatungeriit tunngaviusumik isumaqatigiissummik juunip naanerani angusaqarmata.
Innuttaasunut sullissisut qaffaavigilluarneqartut
Namminersorlutik Oqartussat aamma SIK isumaqatiginninniarnerminni innuttaasunut sullissisut atorfillit akissarsiaat ukkatarisimavaat. Sulisartuni pineqartut tassaasinnaapput nunaqarfinni peqqinnissaqarfimmi sulisut, isumaginninnermut ikiortit, arnarsiat, talittarfinni mittarfinnilu sulisut assigisaallu. Taakku akissarsiatigut immikkut qaffaavigineqarput. Qaffaanerli qanoq annertutiginersoq oqaatigineqanngilaq.
Namminersorlutik Oqartussat tusagassiorfinnut nalunaarutiminni ilisimatitsivoq SIK-mut isumaqatiginninniarnermi sulisartut isumaqatigiissutaasa pitsanngorsaavigineqarneri katillugit 128,2 milliuunit koruuninik naleqartut. Tassa imaappoq, SIK-mi akissarsiat nalingi ataatsimut katillugit 8 procentinik qaffattut.
Isumaqatigiissutit eqimattanut isumaqatigiissutaasunut 24-nut tunngavoq, ilaasortallu 6270 missaat pineqarlutik.
Erninermi sulinngiffeqarnermi akissarsiaqarneq
Erninermut atatillugu sulinngiffeqartut sapaatit akunneri 40-t tungaannut qaammammusiaqarsinnaanerat SIK-p qulakkeerpaa. Taamaasilluni arnaq erninermut atatillugu sulinngiffeqartoq, sulinngiffeqarnermi nalaani aamma soraarnerussutisiaqarnissaminut ileqqaarinniinnarsinnaanngorpoq.
- Ilaqutariit amerligaangami SIK-p isumaqatigiissutai naapertorlugit atorfillit sulinngiffeqarsinnaatitaapput, naartunermi, ernereernerup kingorna qitornavissiartaarnermilu sulinngiffeqarnerminni tamakkiisumik akissarsiaqarsinnaalissapput. Massakkumiit arnat SIK-p isumaqatigiissutai naapertorlugit atorfeqartinneqartut isertitaqarnerminnik pitsaanerungaartumik inissisimalissapput, allassimavoq.
Sulinermi tapit amerlanerusut aamma soraarnerussutisiaqalernissamut ileqqaarfiulissapput. Taamaasillutik SIK-mi ilaasortat soraarnerussutisiaqartalernissaminnut ileqqaarnerulissapput.
Angalanissamut periarfissat pitsaanerusut
Atorfininnermut atatillugu angalanissamik neqeroorfigineqarsimasut, suliffimmit soraarnermut atatillugu aamma angalanissamut neqeroorfigineqarsinnaalerputtaaq. Illuatungeriit ilanngullugu isumaqatigiissutigaat qanigisaasup pinartumik nappaateqarnerani imaluunniit toqukkut qimagunnerani kiffaanngissuseqarluni akissarsiaqartitaanissaat siusinnerusumik pisalernissaa, namminersorlutik oqartussat ilisimatitsipput.
- Taakkua saniatigut SIK-mi isumaqatigiissutit malillugit qaammammusialittut atorfeqartunut ilaqutaasunullu akiliunneqarluni angalanissamut, sulinngiffeqarluni angalanissamut akiliunneqarnissamut aningaasaateqarfimmik immikkut pilersitsiffigineqartussamut tapiissuteqarfigineqartalernissaanik periarfissiisoqassaaq.
Qaammammusialittut atorfeqartut sorliit pineqarnersut ilisimatitsissutigineqanngilaq.
Isumaqatigiissutiginninnerup inerneri SIK-mi ilaasortanut taasisoqarfigisassanngorlugit nassiunneqarput, kingornalu illuatungeriinnit akuerineqarumaarlutik. Akuersisoqareerpat akissarsiat kingumoortumik 1. april 2022-miit nalimmassarneqassapput.