Silaannakkut angallassisussarsiortut
Pituffik timmisartuussisussarsiorpoq. Ukiut kingulliit amerlasuut Air Greenland sullissisuusarpoq.
Amerikap illersornissaqarfiata sakkutooqarfini Pituffimmiittoq (Thule Air Base) ukiut tallimakkaarlugit silaannakkut suliariumannittussarsiortarpoq, kingulliillu 2003-mi, 2008-mi, 2013-mi 2018-imilu suliarinnittussarsiornerit Air Greenlandimit ajugaaffigineqarput. 2003 sioqqullugu qallunaat timmisartortitseqatigiiffiata SAS-ip suliaq tigummisarpaa.
Aviisi Sermitsiaq taama allappoq.
Isumaqatigiissut nutaaq ilaasunik poortukkanillu Pituffiup, Københavnip Kangerlussuullu akornani timmisartuussisarnissat oktobarip aallaqqaataani 2023-miit septembarip 30-nut 2028-mut atuutissaaq.
Suliarinnittussarsiorneq qinnuteqartunullu amerikamiut illersornissamut ministeriaqarfianut timmisartuussisarnissamut apeqqutit aalajangersimasut nittartakkatigut sam.gov.-ikkut akisassat. Suliarinnittussarsiornermut qinnuteqartut tigusisinnaassapput, toqqorsivimmiititsisinnaallutik nassiussalerisinnaallutillu aammalu amerikamiut illersornissamut kiffartuunnissaat isumaqatigiissut malillugu.
Kangerlussuup Pituffiillu akornanni sapaatip akunneri sisamakkaarlugit attartukkami timmisartuussinerit 150-inik ilaasoqarsinnaasut, taavalu nassiussanik 25.000 kg-lunik usisinnaasunik suliassaapput. Aqqutaani unittoqarsinnaalluni. Kangerlussuuap Pituffiullu akornanni attartukkamik timmisartuussinerit 30-nik ilaasoqarsinnaasut nassiussanillu 100 kg-lunik usisinnaasut siumut utimullu qaammammut marluk sisamallu akornanni pisassapput. Timmisartut attartukkat saniatigut timmisartuussinerit nalinginnaasut, ilaasunik nassiussanillu usisut, pisassallutik. Isumaqatigiissut malillugu Københavnip, Pituffiup Kangerlussuullu akornanni timmisartuussinerit (siumuinnaq) ukiumut ilaasut 800-t missiliorlugit angallanneqartassallutik.
Aviisimi Sermitsiami atuarnerusinnaavutit. Aviisi uani pissarsiariuk:
