Silaannakkut aqqutip atoqqaarfissiorneqarnerani Naalakkersuisoq tikilluaqqusivoq
Inuussutissarsiornermut naalakkersuisup Naaja H. Nathanielsenip United Airlines aqqutigalugu USA-mit tikittut siulliit tikilluaqquai. Nuummuunnaanngitsoq, nunattali sinneranut aamma tikilluaqqusiumalluni erseqqissaavoq.
Naaja Nathanielsenip USA-mit tikittut tikilluaqquai.
Foto: Oscar Scott Carl
United Airlinesip timmisartua siulleq New Yorkimiit Nuummut miqqammerpoq, tamannalu Kalaallit Nunaanni politikkikkut aamma malunnartinniarneqarpoq.
Nalunaaqutaq 18.35 timmisartoq United Airlinesimit timmisartuussisoq Nuummut mippoq, timmisartoqarfimmilu ammaanersiortoqarmat tikilluaqquneqarput.
NEW YORK - NUUK
2025-mi juunip 14-ianniit septembarip 24-ata tungaanut United Airlinesip illoqarfiit taakku marluk akornanni timmisartuussisassaaq.
Boeing 737 Max 8 marlunngornerni arfininngornernilu New Yorkimiit Nuummut timmisartuussisassaaq pingasunngornernilu sapaatikkullu Nuummiit New Yorkimut angalasassalluni.
United Airlinesip mittarfik Newark, Manhattanimit 23 kilometerinik kimmut ungasitsigisoq, tikiffigisarpaa.
Kangimut timmisartorneq nalunaaquttap-akunneri sisamat minutsillu 15-it, kitaanullu nalunaaquttap-akunneri sisamat minutsillu 30-t sivisussuseqartassapput.
Ullaakkut Nuummiit timmisartumik aallartoqarsinnaavoq New Yorkimilu suli ullaajusoq tikittoqarsinnaalluni.
Inuussutissarsiornermut, aatsitassanut, nukissiuuteqarnermut, inatsisinik atuutsitsinermut naligiissitaanermullu naalakkersuisoq Naaja Nathanielsen (IA) mittarfimmi katersorsimasunut naatsumik tuluttut oqalugiarpoq.
Aallaqqaammut oqarpoq aqqut taanna „2025-mi tikitassat kajungernarnerpaattut“ taaneqarsimasoq — tamannalu pissusissaminiilluinnartoq.
- USA-mit akunnialuinnannguit timmisartorussi issittumi inuiaqatigiit kusanarluinnartumik avatangiiseqartut tikissavasi. Neriuppugut amerlasuut nuntsinnut tikissasut kujataa, avannaa, kangia kitaalu takornariassallugit. Nunap immikkoortui tamarmik immikkut misigisassarsiorfiusinnaapput timikkut tarnikkullu nukissaqalersitsisut, nunarpullu pillugu tulluusimaarutiginninnermik ataatsimoornermillu pilersitsisut.
Naaja Nathanielsen nangilluni oqaluttuarpoq takornariartitsinerup siuariartornissaa ukiorpassuarni anguniagarineqarsimasoq, erseqqissarpaali Kalaallit Nunaannut taamatulli pingaaruteqartigisoq ineriartornerup piujuartitsisumik ingerlanneqarnissaa.
- Naggataatigut nunani taakkunani marlunni inuppassuit aqqutip tamatuma piviusunngortinnissaanut ilungersorlutik sulisimasut pilluaqquniarpakka. Well done you.
Septembarip 24-ata tungaanut sapaatip akunneranut marloriarluni New Yorkimiit Nuummut timmisartuussisoqassaaq. Nuummiillu New Yorkimut taamatuttaaq toqqaannaq timmisartuussisoqartassalluni.
