Silaannaq tujorminarpoq siunissarlu nalorninarluni

Air Greenlandip timmisartorsua Tuukkaq illoqarfiit pingaarnersaata nunanit tamalaanit mittarfittaavanut sisamanngormat meqqaarmat Nuummi nalliuttorsiortoqarpoq. 

Nuummi innuttaasut amerlasuut oqaluttuarisaanermi pisoq malinnaaffigaat, periarfissallu nutaat ammarmata kaffillertoqarlunilu kalaallinit qallunaaniillu politikkerinit oqalugiartoqarpoq.

Kikkulli tamarmik nalliuttorsiunngillat. Inuussutissarsiortoq namminersortoq Evald Møller Thybo Kangerlussuarmi najugalik taakku ilagaat. Ulloq ”Kalaallit Nunaannut aliasuffiusoq” taanna isumaqarpoq.

- Ulloq Nuummut pingaaruteqarpoq, Kalaallit Nunaatali sinneranut nikalluallannarluni. Nuummi innuttaasut minillugit timmisartumut billetsit tamanut akisuninngussapput. Ineriartornertut taaneqarsinnaangilaq, Evald Møller Thybo oqarpoq. Air Greenlandip Kangerlussuarmit timmisartuussinera kingulleq novembarip 27-ani naggammik aallarmalli silaannaq tujorminartoq taanna oqarpoq.

- Kangerlussuaq nipaappoq. Silaannaq tujorminarpoq. Ikinngutit ilaquttallu amerlasuut maanngaanniit nuupput. Inissisimavipput naluarput. Susoqassanersoq suli naluarput, Evald Møller Thybo oqarpoq.

2025-mi sapaatip-akunnikkaartumik timmisartuussisarnerit

Kangerlussuup mittarfia ukiuni qulikkuutaani nunatta mittarfiisa pingaarnersaraat, nunattalu nunarsuup sinneranut attaveqaatigalugu. Kalaallit Nunaanni mittarfiit nutaat marluk, Nuummi Ilulissanilu, maanna attaveqaataalissasut naatsorsuutigineqarpoq. Mittarfiit nutaat pillugit aalajangiisoqarneraniilli Kangerlussuup siunissaa ukiorpassuarni nalornissutigineqangaatsiarsimavoq.

Ukioq mannali siusinnerusukkut Air Greenlandip Albatros Arctic Circlellu Kangerlussuaq sapaatip-akunneranut marloriarluni Københavnimut Københavnimiillu timmisartuussiffigineqartassasoq isumaqatigiissutigaat. Piffissami marsimiit oktobarimut 2025-mi timmisartuussisoqartassalluni. Kangerlussuarmi mittarfik timmisartunit anginerusunit suli atorneqarsinnaanissaa paasineqarmat isumaqatigiissut atsiorneqarpoq.

- Kangerlussuup Københavnillu akornanni toqqaannartumik aqquteqarnissaa tunngavissaqarluartoq nalilerparput, aamma timmisartoq ingerlaqqiffiusinnaasunut allanut atorsinnaagatsigu, Air Greenlandip niuernermut ingerlatsinermi pisortaanera Kasper Thomsen Rungfeldt Kasper Thomsen Rungfeldt ukioq manna siusinnerusukkut tusagassiutinut nalunaarpoq.

Paasissutissanik amigaateqartoq

Tamannali naammanngitsoq Evald Møller Thybo isumaqarpoq. Taanna Arctic Wool ApS-imi ulluinnarni pisortaavoq, saniatigullu Kangerlussuarmi takornarialerisuulluni. Air Greenlandimiit paasissutissanik amerlanerusunik perusuppoq.

- Suniarpat, sunianngillallu? Tassa tamakku akissutiserusutagut. Innuttaasutut suut piareersarfigineqassappat? Timmisartorsuaq Nuummut missinnaanngippat angalasut qanoq sullinneqassappat? Paasititsisoqanngilaq, oqarpoq.

Air Greenlandip Kangerlussuarmi timmisartoqarfia novembarip 26-ani naggammik ammavoq. Timmisartoqarfiup ulluinnarni ingerlanneqarnera Greenland Airportsimit isumagineqalissaaq. - Tusarpara timmisartorsuaq Nuummut missinnaanngippat Kangerlussualiarani Islandimukartassasoq. Paasisinnaanngilara, Air Greenlandimi ilaasumini Kangerlussuarmi ukiuni 64-ini unnuisoqartarsinnaanikuummat, Evald Møller Thybo oqarpoq.

Air Greenlandip ilaasut Islandimukaattassanerai allaaserisap suliarinerani killigititap iluani uppernarsartinnissaa iluatsissinnaasimanngilaq.

Ukiuunerani takornariaqarneq ajornartorsiorpoq

Fritz Baumann Petersen Kangerlussuarmi ukiuni 30-ni najugaqarsimavoq. Nunaqarfimmi innuttaasut amerlasuut nuunnerat pissutigalugu allanngortoqartoq malugisinnaavaa.

- Aqqusinermi inuit ikinnerupput timmisartullu mittarfimmiittut ikinnerullutik, nunaqarfiullu akunnittarfiani Vandrehjemimi maannakkorpiaq ataasinnguamilluunniit unnuisoqanngilaq. Tamanna soorunami aningaasaqarnermut sunniuteqassaaq, Fritz Baumann Petersen, kommunimi teknikkimut tunngasunik ingerlatsinermi ingeniøriusoq oqarpoq.

Kangerlussuarmut Kangerlussuarmiillu marsimiit timmisartuussisoqartalernissaa nuannaarutigaa. Apeqqutilli arlallit suli akineqarsimanngitsut isumaqarpoq.

- Nalunngilara takornarialerisut januaarimi, ukiukkut qimussertitsinermik takornariartitsisoqaleraangat, ulapittupilussuusartut. Timmisartullu qulaatiinnartalermatigut tamanna pisinnaanngilaq.

- Ukiukkut takornariartitsisartut ingerlaannarsinnaaniassammata pimoorussisoqarnissaa ikiuuttoqarnissaanullu nalornisoqarnera inissinneqartariaqarpoq, oqarpoq.

Isumalluarnertik attakkaat

Tuukkap Nuummut siullermeerluni ulloq taanna minnerani Qeqqata Kommuniani kommunalbestyrelsi ataatsimiippoq. Kangerlussuup siunissaa innuttaasullu nunaqarfimmi najugaqaannarniartut pillugit ataatsimiinnermi ilaatigut eqqartorneqarput. Silaannaq tujorminarpoq, borgmesteri Malik Berthelsen kommunalbestyrelsip ataatsimiinnerani oqarpoq.

- Ulluni makkunani Kangerlussuarmi najugaqartunut qimatsisariaqalertunut pissutsit misigissutsikkut pikkunarput. Aamma tamanna najugaqartut aallakaanerini takuneqarsinnaavoq. Ulloq ernummatiginikuusarput, ullumikkullu tassa timmisartorsuaq siullermik Nuummut mittussaavoq. Ippassaani Kangerlussuarmut naggataamik tikilluni, borgmesteri oqarpoq.

Malik Berthelsenili aamma saammarsaalluni Kangerlussuarmi inuussutissarsiorneq, takornariaqarneq najugaqartullu amerlassusaat isumalluarfigalugu oqarpoq. Kisitsisimmi kingulliit takutippaat nunaqarfik 400-t missaanni suli innuttaqassasoq. Kangerlussuarmi najugallit 2024-mi januaarip aallaqqaataani 517-iusut Naatsorsueqqissaartarfiup kisitsisaataani takuneqarsinnaapput.

Kangerlussuup siunissaa Evald Møller Thybo aamma isumalluarfigaa.

- Periarfissanik nutaanik peqalernissaa neriuutigaarput, ineriartortitsiniarlutalu sapinngisarput tamaat sulissaagut. Maannali isaasalerlugu kisimiilerpugut, taamaammat unikaallariarluta eqqarsaqqaartariaqarpugut. Innuttaasut aalajangiisartullu, Evald Møller Thybo oqarpoq.