Silap pissusaata ajornartoortitsinera: Piniartut aalisartullu nunatta avannaarsuaniittut ikiorneqalerput
Piniartut aalisartullu 75-it Qaanaami nunaqarfittaanilu aammalu Ittoqqortoormiini najugaqartut ikiorneqarnissaminnik qinnuteqarnikuusut tamarmik 15.000 koruuninik ataasiartumik tunineqassapput.
5. januar Naalakkersuisut aningaassaqarnermut ataatsimiititaliamut qinnuteqaammik apuussinikuupput. Qinnuteqaallu sapaatip akunnera qaangiuttorlu maanna akineqarsimalerpoq, taamaalillutillu Naalakkersuisut piniartunut aalisartunullu ikiorneqarnissaminnik qinnuteqarsimasunut aningaasanik 15.000 koruuninik tunniussisinnaalerput.
Tallimanngornermi ualilluarnerani tusagassiuutitigut nalunaaruteqarluni taamak ilisimatitsivoq aalisarnermut piniarnermullu naalakkersuisoqarfik.
- Piniartut aalisartullu sumiiffinni pineqartuni ajunaarnersuartut ittumik, silap pissusaata allanngornerata kingunerisaanik, soorlu sikkorluttuni aamma silarlummik nalaataqartut, aningaasarsiorfissatut ikkunnaartuni ikiorsiissutinik tunineqassapput, naalakkersuisoqarfimmit ilisimatitsissutigineqarpoq.
Suleqatigiissitamik suligasuarsinnaasumik pilersitsisoqassaaq
Ilanngullugu naalakkersuisoqarfimmit ilisimatitsissutigineqarpoq Naalakkersuisut kissaateqarsimasut suleqatigiissitamik pilersitsisoqassasoq suleqatigiissitarlu taanna naalakkersuisoqarfinnit attuumassuteqartunit inuttaqartinneqassasoq.
Suleqatigiissitap qaammammiit qaammammut, piniartuunerup qanoq ingerlanera malinnaavigissavaa, taamaalilluni qaleralinnik, puisit amiinik aamma piniakkanik allanik killilersukkanik tunisineq qanoq ingerlanersoq malinnaavigisinnaallugu.
- Taamaalinikkut ullormiit ullormut piniartut inuussutissarsiorsinnaajunnaarallarnerinik ikiuinasuarnissaq pisinnaanngorlugu, kisitsisinik eqqortunik tunngaveqarluni sulisinnaassalluni, tusagassiuutitigut nalunaarummi erseqqissaatigineqarpoq.